Kolasib-ah Youth Summit & Road Show

Mizoram Youth Commission (MYC) chuan nimin khan Kolasib-a Taitesena Hall-ah MYC Youth Summit & Road Show 2018 an buatsaih a, Hmingdailova Khiangte, MLA-in a hawng.

Hmingdailova Khiangte chuan, ṭhalai tam tak, thiamna nei hna nei si lote tan MYC-in hma a la chu lawmawm a tih thu sawiin, "Eizawnna kawng hrang hrangah rilru leh ngaituahna ṭhalaite'n an sèn a pawimawh. Kawng hrang hranga zirna mai bakah, hna thawh tur thlengin MYC leh a thawhpuite chuan kawng an kawhhmuh thei a, ṭhalaite tana sorkarina hmalakna ṭha tak a neih chu chhawr ṭangkai ṭheuh kan tum tur a ni," a ti.

MYC hian district khawpui tinah MYC Youth Summit & Road Show an buatsaih dawn a; Youth Summit & Road Show hawnna (kick-off) chu Aizawlah April 17-18, 2018 khan Assembly Annexe-ah neih a ni a, nimina Kolasib-a buatsaih hi district headquarters-a buatsaih hmasak ber a ni.

Youth Summit & Road Show hi kawng hrang hranga Mizoram ṭhalaite hmasawnna tura infuihna leh inzirtirna hun atan te, skill development lama ṭhalaite hmasawnna tur thil ṭul chi hrang hrang inhrilhhriat nante leh, lehkha zirna leh hna thawh tur thlenga kawng inkawhhmuh nan ṭangkai taka hman tura ruahman a ni.