National Panchayati Day hmang

Nimin khan Champhai IPR conference hall-ah National Panchayati Day (Gram Swaraj Abbhiyan) hman a ni a, village council member-te chu sorkar laipui scheme hrang hrang zirtir an ni.

Day hmanpuitu Champhai DC Vanlalngaihsaka chuan, kum 1992-a India danpui siamṭhat vawi 73-nain a hrin chhuah Panchayati Raj system ang tak chu Mizoramah a awm ve lo a, village council system-a kal zawk a nih thu a sawi a, "Sorkar laipui duh dan chuan he ni hi V/C tinah hman ni se tih a ni," a ti.

V/C member-te chu khawtlang hruai­tu leh khaw­tlang mamawhte hretu ber an nih thu sawiin Champhai DC chuan, "Sorkar aṭanga khawtlang hmasawnna tur ṭanpuina kalte pawh an kutah thui tak a in­nghat a ni," a ti a; sor­kar scheme hnuai­a a dawng tur dik takte'n an dawn chu thil tih dan dik leh ṭha a nih thu a sawi.

Inkhawmah hian V/C member kalkhawm­te chu mithiamte'n sorkar laipui scheme hrang hrang thil tum leh nihphungte an hrilhfiah a, zawhna an neihte an chhang nghal a ni.

Gram Swaraj Abbhiyan hi April 14 aṭanga May 5 thleng awh tur a ni a, a tum ber chu village council tihchaka an kutke ngeia dinga inrelbawl thei tura buatsaih a ni. India ramah Panchayati Raj Day hi kum 2010 khan hman ṭan a ni.