CADC-ah kan chak loh chhan chu Party chhung boruak vang - MPCC Media

MPCC Media Cell-te chuan nimin tlai khan Serchhip Cable Network studio-ah thuthar thehdarhtute kawmin, Chakma Autonomous District Council (CADC) ah hnehna an chan loh chhan chu an party chhungkaw boruak vang a nih thu an sawi.

MPCC Media Cell chairman James Thang­hmingmawia chuan inthlan hrang hrangah hnehna an chang chho zel tih sawiin, "Chutihlaiin nimina result tihchhuah, CADC inthlanah erawh kan beisei a sân loh ang takin sorkarna kan siam zo lo. Hei hi a chhan chu an party chhungkua boruak avang a ni a, kan beisei aiin MDC kan nei tam zawk. MLA inthlanah erawh CADC-ah hian hnehna kan chan ngei kan ring," a ti.

James Thanghmingmawia chuan Congress sawrkar hmalakna avangin mipuiten Congress-ah rinna an la nghat nia sawiin, "Boruak kan thlirin kan la sorkar leh ngei dawn a ni. Serchhip mipuiten MPCC President leh Chief Minister ni bawk Pu Lal Thanhawla an thlan tlin ṭhinnaah lawmthu kan sawi a, Serchhip hian MLA Constituency dangte aiin malsawmna leh duhsakna an dawng a ni," a ti a, Serchhip chu district-ah pawh a changtlung pawl tak a nih thu a sawi.

Congress sorkarin kum 10 chhungin an intiam ang te an tihhlawhtling tih sawiin MPCC Media Chairman chuan, "NLUP chhungkaw 1,35,189 pek an ni tawh a, tunah hian MLA constituency tinah chhungkaw 400 ṭheuh pek leh tum a ni. A ṭhen chuan an thlang fel tawh a, thlang mek an la awm bawk. NEDP hnuaiah pawh kawng hrang hrangin hmalak a ni. Congress sorkarin hmasawnna hna a thawhte hi mipuiin an hria a, sorkar thlak duh ngawih ngawihna a la awm lo," a ti.