Sorkarin Sawhthing hralh dan tur ruahman

Plannin minister Lalsawta hoin nimin khan a pisaah sorkar hotute leh society ṭhenkhat hotute an ṭhu khawm a; kut hnathawktute'n sawh­thing an tharte an hralh chhuah zung zung theih dan tur sawihoin, rua­hmanna an siam.

Meeting-ah hian sawhthing chingtute'n sawhthing hralh kawnga harsatna an tawh hrang hrangte sawiho a ni a; harsatna sutkian a nih theihna atan ruahmanna siam niin, ruahmanna chu rang taka hman nghal tura rêl a ni.

Meeting-a an rêl dan chuan, sawhthing hralhna ṭanpui turin primary agriculture credit societies (PACS) 23-te'n chak takin hma la se, an ti a; Mizoram Agricultural Marketing Solution (MAMSOL) te, aggregator leh entrepreneur-te'n awlsam zawka sawhthing hralhna an buatsaih theih nan revolving fund ruahman ni se, an ti. Ruahmanna chak taka enkawla hma la turin Technical Committee din an rêl bawk.

Meeting-ah hian Planning Board vice chairman H Liansailova, Planning department secretary Dr C Vanlalramsanga, Commerce & Industries secretary Zothankhuma, Horticulture secretary Sawihlira, Mizoram Cooperative Apex Bank chairman Lalmuanpuii te bakah, Finance department, Planning department, Commerce & Industries department, Horticulture department leh Agriculture department hotu te, Mizoram Agriculture Crops Growers and Marketing Society (MACGAMS) chairman leh secretary te, Mizoram Entrepreneurship Network leh Zospice International hotute an tel a ni.