CADC-ah INC-BJP sorkar a ding dawn ; CEM tur Santi Jiban Chakma (BJP)
Chakma Autonomous District Council (CADC) inthlan result puan a nih hnuah, Indian National Congress (INC) leh Bharatia Janata Party (BJP)-te chuan sorkar an siam dawn. Chief executive member (CEM) atan BJP MDC Santi Jiban Chakma thlan a ni.
CADC-a MDC bial 20 zinga inthlan neihna bial 19-ah MNF-in seat pariat lain an la tam ber a, INC-in seat paruk leh BJP-in seat panga an la thung a; party mala sorkarna siam thei an awm loh avangin Thawhlehni aṭang khan sorkar siam dan tur leh thawhho dan tur ngaihtuahin political party pathum hruaitute chuan ṭan an la nghal.
Chawngte aṭanga thu dawn danin, nimin khan Chawngte-a Tourist Lodge-ah Congress leh BJP MDC-te chuan Joint Legislature Party (JLP) an din a, sorkar inṭâwm siam turin thuthlung an ziak a, thuthlungah hian party pahniha MDC zawng zawngin hming an ziak a ni.
CADC-a INC leh BJP sorkar thar turah hian BJP MDC Santi Jiban Chakma, Chhotapansury bial aṭanga thlan tlin chu Joint Legislature Party leader atan thlan a ni a, chief executive member (CEM) a ni dawn.
INC MDC Buddha Lila Chakma, Vaseitlang bial aṭanga thlan tlin chu JLP deputy leader a ni ang a, INC MDC dang Onish Moy Chakma, Mandirasora biala thlan tlin chu secretary a ni ang.
CADC-a INC-BJP sorkar inṭâwm siam tur chungchangah hian a hmuna awmchilhtu Congress Legislature Party (CLP) treasurer Zodintluanga chuan zawhna chhangin, "He coalition sorkar hi kan sawi lâwk tawh angin, anmahni ruahmannaa ṭha an tih anga an kalpui a ni a, hei hian Delhi lama Congress leh BJP thawhho emaw, state inthlana Congress leh Mizoram BJP thawhho lam a kâwk lo. CADC huam chhung chauh thawhhona hian a kâwk a ni," a ti.
Nimina Tourist Lodge-a INC leh BJP MDC-te inhmuh khawmnaah minister PC Lalthanliana chuan, CADC sorkar thar piang tur chu, CADC huam chhunga mipui beisei ang taka sorkar ṭha, langtlang sorkar leh sorkar ngêlnghet, mipuite rin ngam sorkar ni tura a duh thu a sawi.
CEM thar tur Santi Jiban Chakma chuan, sorkar an siam hunah CADC chhunga kawng siam lamah hmalak nasat a tum thu a sawi a; state-a rorel lai chief minister Lal Thanhawla hnen aṭangin puihna an dawn ṭhin angin, nasa taka an dawn leh zel a beisei thu a sawi bawk.
Hetih lai hian, April 24, Thawhlehni khan MNF president Zoramthanga chuan a pisaa press conference a neihnaah, CADC-ah hian MNF party chuan BJP nen sorkar an siam tur thu a lo puang tawh a, hemi ni vek hian Mizoram BJP president Dr. JV Hluna pawhin MNF nen sorkarna an siam tur thu thuthar thehdarhtute a hrilh a ni.
CADC-a sorkar siam tur MDC-te
INC member-te
# MDC Hming MDC Bial
1. Amit Kumar Chakma Rengkashya
2. Ajay Kumar Chakma Udalthana
3. Onish Moy Chakma Mandirasora
4. Buddha Lila Chakma Vaseitlang
5. Bubon Kumar Chakma Devasora South
6. Mohan Chakma Parva
BJP member-te
1. Kusum Loda Chakma Borapansury-II
2. Santi Jiban Chakma Chhotapansury
3. Anil Kanti Chakma Bajeisora
4. Shanjib Chakma Kalamanagar 'W'
5. Hiranand Tongchangya Damdep