Aizawlah dawr hawn phal a ni lo

Aizawl district ma­gistrate Vanlal­ngaih­saka chuan nimin khan hriattirna chhuahin, Aizawl Municipal Corpo­ration (AMC) huam chhungah dawr hawn khap a nih thu a puang. Hetih lai hian, dawr hawn phalsak bikte leh local task force-te'n an huam chhunga dawr hawn phalna an pek theih dan ruahmanna a siam bawk.

June 8, Thawhṭanni zana total lockdown kaihhruaina sorkarin a chhuah behchhana thuchhuah a siamah Aizawl DC chuan, AMC area-a dawr hawn khap a nih thu hi a puang a; nimahsela, ni tin mamawh (essential commodity), mihring leh ran damdawi, thlai chi leh kut hnathawktute mamawh, oil leh motor spare part zuarte dawr chu, "An mamawh dan azirin local task force-te hriatpuiin tlai dar 5 thleng hawn phal a ni," a ti.

Local task force-te chu dawr hawn phal chinte inhawn dan ruahmanna siam tura tih an ni a, thlai leh chawhmeh zuarte inzawrh dan turah pawh ruahmanna an siam ang.