World Malaria Day hman a ni ; Kuminah sikserh vei mi 426 an awm tawh

Nimin kha World Malaria Day a ni a, Mizoram hmun hrang hrangah hman a ni. Aizawlah chuan zing karah High School Field, MacDonald Hill-ah Health minister Lal Thanzara hoa hman a ni a, Day puala buatsaih Bike Rally a vai liam. He hunah hian kumin chhung, March 2018 thlengin sikserh vei mi 426 an awm tawh thu tarlan a ni.

State Vector Borne Di­seases Control Program­me (SVBDCP) huaihawta World Malaria Day hman­naah hian Health Minister chuan, World Health Orga­nisation (WHO)-in kum 2017 report-a a tarlan danin, kum 2016 khan khawvel pumah mi nuai 2160-in malaria an vei a, nuai 4 chuang an thih phah tih a sawi a, "Khawvel pumah malaria vei an la tam hle a ni," a ti.

Sikserh chu inven theih leh tihdam theih natna a ni tih sawiin Lal Thanzara chuan, "Thosi laka kan inven ṭhat te, thosi inthlah pung tur kan vente a ṭul. Thosi seh laka inveng turin thosi lên hnuaia mut bakah, thosi hnawh kianna hâl chi leh taksa chulh chi a hman theih a ni," a ti a; Health department-in kum 2016-ah thosi lên, damdawia chiah sa (long lasting insecticidal net) 5,29,000 a thlawna an sem a nih thu leh sorkar damdawi-in zawng zawng leh sub-centre-ahte a thlawnin thisen endiktir theih a nih thu a sawi.

Health Minister chuan, sorkar laipuiin kum 2030-ah India ram chu sikserh awm lohna ramah siam a tum tih sawiin, chumi tihlawhtling tur chuan Mizoramah pawh nasa taka hmalak a nih thu a sawi a, "Malaria natna titlema ûmbo tur hian Health department-a thawkte inpekna chauh a tâwk lo a, Zoram mipui bakah, pawl hrang hrangte thawhhona a pawimawh a ni," a ti.

Health & Family Welfare principal director Dr F Lallianhlira pawhin thu sawiin, sorkar laipuiin kum 2030-a malaria ûmbo a tumnaah Intensified Malaria Elimination Project (IMEP) chu GFATM (Global Funds for AIDS, TB & Malaria) hnuaiah kalpui mek a nih thu a sawi a; sikserh ûmbo a nih theih nan DDT kah, thosi pian theihna tibo tura hmalak, damdawia chiah thosi lên sem leh mipui hnena zirtirna hrang hrang kalpui ṭhin a nih thu a sawi bawk.

Kumina World Malaria Day thupui chu 'Ready to beat malaria’ (Malaria hneh turin i inpeih ang u) tih a ni a; a hmanna inkhawm hi NHM mission director Dr Lalrozama'n a kaihruai a, Health department-a thawkte an tel.

Health Minister hian Aizawl Thunders-in bike rally an neih a vai liam a, Aizawl Thunders hian veng hrang hrangah malaria awareness campaign an nei dawn a ni.

Sorkar thuchhuah tarlan danin, kum 2017 khan Mizoramah sikserh vei mi 5,715 awmin mi paliin an thih phah a, kum 2016 aiin kum 2017-ah hian sikserh natna 24.63%-in a tla hniam a, sikserh vanga thi zat pawh 55.56%-in a tlahniam a ni.

Kumin chhung bikah, March 2018 thleng khan sikserh vei mi 426 hmuh chhuah an ni tawh.