Police-in ruihhlo hlauhawm an man

Vairengte Police checkgate-a duty-te chuan, nimin zing dar 7 vel khan methamphetamine leh caffeine pawlh ruihhlo mûm 73,800 an man a, hei hi tualchhunga hralhna ang chuan cheng nuai 18.45 hû a ni.

Vairengte Police Station aṭanga thu dawn danin, police-in ruihhlo an man hi methaphetamine (meth) a ni a, caffeine pawlh niin, methamphetamine pangngai aiin a chak zawk a ni.

Meth leh caffeine pawlh hi Zombie drug tia sawi ṭhin a ni a, a ngawl veite chuan mahni intihnatte an chíng ṭhin. Mizoramah hetiang ruihhlo hi a hluar vak loh avangin a man pawh hi internet lama a man an tarlan anga chhût a ni a, tualchhung rate-ah chuan hei ai hian a san zawk rin a ni.

Vairengte police-te hian nimin zing khan random checking an nei a, Bolero pakhat chu an rinhleh avangin an endik a, a kawngkhâr kilhna a ngheh loh avangin rinhlelh thilah an hawng a, ruihhlo hi an man ta a ni.

Bolero-a chuang Khuplianmung (36) s/o TS Thang (L), Haulamnuang (23) d/o Khupthang (L) leh Kapmuanmang (23), Tungpau (L), Manipur vekte chu an man nghal.

Haulamnuang leh Kapmuanmang-te hian an ṭhianpa Khuplianmung hi an zinpui mai mai nia in ngaiin, ruihhlo a keng tih an hriatpui loh thu an sawi. Khuplianmung hi ruihhlote hi phur tura rawih nia thu dawn a ni.