KHAWTHLIR

Dan loa zuar man
Siaha-a Legal Metrology enforcement-te leh police-te chuan, nimin khan Siaha khawpuiah dan loa gas leh tuialhthei zuarte an enfiah a; dan loa gas zuar pahnih leh petrol zuar pakhat an man.

MCS-ah tling
MPSC chuan MCS Junior Grade atana departmental officer-te personal interview result nimin khan a tichhuak a; (rank indawtin) Agriculture officer Denny Lalchhuanawma, AH&Very officer Dr Peter Malsawmtluanga, Police deputy SP Timothy R Lalhmangaiha leh Saitual College assistant professor Dr Saithangpuia te an tling.

College hall hawng
Lunglei College multipurpose hall sak thar chu nimin khan Higher & Technical Education minister R Romawia'n a hawng. Minister chuan, zirlaite chu sorkar hna awmte'n a daih sêng lo tih hria a, hmathlir thui tak nen lehkha zir turin a chah. Hall hi RUSA sum cheng nuai 70 sênga sak a ni.

Thisen pe
Industrial Training Institute (ITI) Red Ribbon Club chuan, nimin khan an hmunah blood donation camp an huaihawt a, Aizawl Civil Hospital tan mipa 54 leh hmeichhia 11 ten thisen unit 65 an pe.

Yoga seminar
National Ayush Mission leh 46 Assam Rifles ṭangkawp chuan, Healthy Mizoram Campaign hnuaiah nimin aṭang khan 46 Assam Rifles, Aizawlah ni thum awh tur Seminar on Yoga & Naturopathy an buatsaih. Nimina Seminar on Yoga & Naturopathy-ah chuan ICFAI University vice chancellor Lt.Gen. AK Mishra khuallian a ni a, vawiinah Governor khuallian a ni ang.

Officer sîksawi
Mizoram sorkar chuan IAS leh MCS officer-te a sîksawi a, DPAR deparment-in April 24 khan order a tichhuak. Lunglei DC Lalzarmawii (IAS) chu Administrative Training Institute (ATI) director-ah, ATI director Dr Ankita Chakravarty (IAS) chu Lunglei DC-ah, Mamit DC Lalbiaksangi (MCS) chu Home department Joint Secretary-ah leh, Bhupesh Chaudhary (IAS) chu Mamit DC-ah an awm ang.