MZU-in an din champha lawm

Mizoram University (MZU) chuan nimin khan an auditorium-ah MZU din champha vawi 18-na an lawm a, Finance minister Lalsawta'n a hmanpui.

Finance Minister chuan, Mizoramin university chhuan­awm tak, India ramah pawh zahpuiawm lo tak, tehna hrang hranga mark hmu sang tak a nei chu a vanneihthlak a tih thu a sawi a, "MZU-in kum 18 chhunga a thlen chin leh a hlawhtlinpui tam takte hi thil ropui tak, zirlaite leh Mizoram tana hlâwkna tam tak a ni," a ti.

MZU-in mithiam chher chhuah piah lamah, a hnuaia thawkte kaltlangin Mizoram hmasawnna tura thluak leh tha thawh kawngah hnûhmá a ngah tawh hle tih sawiin Lalsawta chuan, "Kawng tam takah sorkar thawhpuiin, NEDP-ah phei chuan a kúl a táia thawktu leh thluak thawhtu an ni," a ti a; Mizoram sorkar pawh MZU chungah a lawm thu a sawi.

Minister Lalsawta chuan zirlaite fuihna thu sawiin, "Mizoram aia sik leh sa nuam zawk khawvel hmun dangah a awm lo. Mizoram chhunga mite zawng zawng ṭawng pakhatin kan inbe vek thei. Ziak leh chhiar thiam state kan ni bawk. Heng remchannate hi in hriat a, kan hun neih zah leh ram changkang zawkte hun neih rei dan a inang tih in chian phawt chuan, mahni hlawhtlina atan bakah, ram tana hmasawnna nasa tak thlentu in ni ang," a ti.

MZU vice chancellor Prof. KRS Sambasiva Rao chuan, MZU-in tun hun a thlen theihna tura an tha leh theihna lo thawhtu zawng zawngte chungah lawmthu a sawi a, "Zirlaite mithiama chher turin research lamah theihtawp a chhuah dawn bakah, Mizoram mipui hmasawnna turin a theihna zâwnah nasa zualin ṭan a la chhunzawm dawn," a ti a; MZU hlawhtlinna langsar zualte leh hmachhawpte a tarlang.

MZU hi April 25, 2001-ah din a ni a, July 2, 2001 aṭangin a taka hna thawk ṭanin, zirna kalpui ṭan a ni. Tunah hian MZU hnuaiah constituent college pakhat - Pachhunga University College leh affiliated college 31 a awm mek.

Kum 2014 khan National Assess­ment and Accreditation Council(NAAC) chuan zirna-in ṭha zual zingah MZU hi tehtlingin, NAAC Grade 'A' a pe a; National Institutional Framework chuan ram chhunga zirna-in ṭha zual a thlan zingah MZU chu a thaber 94-na pein, university zingah chuan 58-naah a dah a ni.