Mamit College-ah smart classroom hawng

Rashtriya Uchchatar Shiksha Abhiyan (RUSA) hnuaia cheng nuai 70 sênga Mamit College-a smart class­room sak thar chu nimin khan bialtu MLA, minister John Rotluangliana'n a hawng.

John Rotluangliana chuan, smart classroom hawn a ni ta chu a lawmawm a tih thu sawiin, "A hming ang tak leh a nihna tur ang taka hmang tur chuan zirlaite leh zirtirtute pawh kan smart a ngai dawn a ni," a ti a; zirlaite chu tum mumal tak nei a, taimakna leh chhelna nena an zirlai zir turin a chah.

Mizorama hna zahawm leh sangte chu Mizo zingah a luah khattu tur an awm lo a nih chuan hnam dangte'n an luah zel dawn tih sawiin, Rotluangliana chuan, "Chuvang chuan, kan ram chhunga hna sang zawk thawk thei tura tumruhna nen zirlaite'n ṭan an lak a ṭul. Social media hman fimkhur a ngai a, hriatna tihzauna atan hman a pawmawh" a ti.

Mamit DC Lalbiaksangi pawhin thu a sawi a; Mamit district chu aspirational district an nih angin, zirna leh hriselna lamah theih ang anga thuam ṭhat zel tum a nih thu a sawi.