Candidate atan ṭhalai zawkte dah turin PRISM ṭhalai president-in party-te a ngen

Peoples Representation for Identity and Status of Mizoram (PRISM) party ṭha­lai president RL Lian­tluanga chuan, kumina Mizoram Assembly inthlanpui awm turah political party tinte'n candidate atan ṭhalai zawkte dah se an duh thu a sawi a, Mizoram mipuite chu party sawi loa candidate mi ṭhate ram hruaitu atana thlang turin a ngen.

Mizoram inthlan awm tura PRISM candidate turte zinga mi RL Liantluanga hian nimin khan Aizawl Press Club-ah thuthar theh­darhtute a kâwm a; political party tinte'n ṭhalai mi ṭha tak tak an nei tih an hriat thu sawiin, "Party tinte hian MLA candidate atan ṭhalai a tam hmang se tiin kan ngen an ni. Political party lian pahnih Congress leh MNF phei chuan an MLA ni lai zingah pawh chief minister atana zahpuiawm lo tur an nei a ni," a ti.

PRISM ṭhalai President chuan, sumdawnna atana politics hmang ṭhinte chu candidate atan party tinin hmang lo se an duh thu sawiin, "Lal zel duh ho ram hmangaih tak tak lo an ni ṭhin hi a pawiin dik taka rorel a ti harsa ṭhin. Heng ho hian anmahni inhaivûr leh in leh lo din thar belh nan bak an hmang ngai lo," a ti a; mipuiin party induhsakna uchuak an ning tawh a, mipui huap sorkar siam tum turin party tin an ngen tih a sawi.

Political party-a buai lo a, mimal bihchian nachang hre tura mipui chahin RL Liantluanga chuan, "Kan aiawh tura kan thlante mimal thutlukna a pawimawh a. Kan party candidate pawh ni lo mah se, mi ṭha zawk nia kan hriat chu kan vote tur a ni. 'Vawkpui pawh ni se, kan party candidate a nih chuan ka vote ang' tih hun kha kal pelh a hun tawh," a ti a; mipuite chu party thliar loa ram hruaitu atana mi ṭha thlang turin a chah.

Zawhna chhangin PRISM ṭhalai President chuan, kumina inthlan awm turah PRISM-in bial zawng zawng (40)-ah candidate neih an tum a, chutih rualin, Zo hnahthlak chiah candidate atan dah an tum thu a sawi.