MYC Chairman leh Jet Airways hotute inkâwm

Jet Airways hotute chuan nimin khan Mizoram Youth Commission (MYC) chairman Joseph Lalhimpuia, MLA chu a chenna inah an kâwm a, thil pawimawh hrang hrang an sawipui.

Joseph Lalhimpuia chuan, Mizo ṭhalai eng emaw zat Jet Airways-a an thawk chu ṭha a tih thu a sawi a; Jet Airways cabin crew leh ground staff hnaah Mizo ṭhalaite tan Mizo traditional dress-a inthuam ni bik awm se a duh thu sawiin, "Mizo thuam mawi tak hmanga ṭhalaite an inthuam theih chuan Jet Airways pawhin a mawi phah ngei ka ring," a ti.

MYC Chairman chuan, Jet Airways-in Aizawlah cabin crew mai bakah, ground staff tura hna lak tam zawk nei tura a duh thu sawiin, kumin September hian Jet Airways hnuaia thawk tur lakna recruitment drive nei leh turin Jet Airways hotute a sawm a ni.

Jet Airways hian April 24, Thawhlehni khan MYC pasaah cabin crew recruitment an buatsaih a, mi 232 an inlan a; mi 232 aṭangin mi 29 an thlan hnuah, interview second round-ah (height & weight) mi 19 an tling. Chumi hnuah group discussion round-ah mi 12 an tling leh a, a la tling zawng hian nimin khan interview fourth round hmachhawn lehin, final round hmachhawn turin an tling leh vek a ni.