Gujarat loneituten thih phalna dil

Gujarat-a Bhavnagar district-a loneitu mi 5,000 chuang chuan thuneitute hnenah lehkha thawnin thih phalna pe turin an ngen.

Loneitute hi state sorkar leh Gujarat Power Corporation Limited (GPCl) ten power plant siamna tura an ram a lakluihsak avangin an buai mek a ni. He thilin a nghawng, thingtlang khaw 12-a lonetiute leh an chhungte chuan intihhlum phalsak turin thuneitute hi an ngen niin loneitute dikna chanvo humhalh sak tura beitu, Gujarat Khedut Samak member Narendrasinh Gohil chuan a sawi.

Gohil chuan loneituten ngenna an siamah hian anmahni bakah an chhungten hming an ziah vek a, President, Prime Minister leh Gujart chief minister hnenah thawn a ni tih a sawi bawk.

Thuneitute hnenah lehkha an thawnah, loneitute chuan state sorkar leh GPLC chu an eizawnna ber, an thlai chinna ram aṭanga hnawtchhuak tura police chakna hmangah an puh. GPLC chuan an ram chu kum 20 chuang zet neihsak a lo tum tawh tih an sawi bawk a ni. Tihluihna hmanga an ram chhuhsak tum an ni chu firfiak ang maiin sorkar chuan a en nia an ngaih thu an sawi a, hei vang hian sipaite kuta thih mai pawh an thlang zawk tih an sawi.

Gohil chuan, "Land Acquisition Act, 2013 hnuaiah company chuan kum nga chuang a ram anga a lo neih tawh chu a chhuhsak ngawt thei lo a ni. He ram nei tur chuan dan ang taka a bul aṭanga a kalpui a ngai a ni. Hetih lai hian police-te chuan ram neitu, loneituten an ram chhuhsak tum an nih avanga lungawi lohna an lantirnaah hnawhdarh nan tear gas-te an hmang a, sorkar chuan a vauin a hrek bawk a ni", a ti.