Mizoramah HIV+ve 16,451 hmuh a ni ; tawh HIV/AIDS vangin mi 1,766 an thi tawh

Nimin khan HIV/AIDS chungchanga India hmarchhak biala hmalaknate thlir letna hun, Hotel Regency-ah hman a ni a, vawiinah chhunzawm a ni ang. He hunah hian kumin January thla thleng khan Mizorama HIV hrik pâi hmuh chhuah tawh zat chu mi 16,451 an ni a, AIDS vangin mi 1,766 an thi tawh tih an tarlang.

Review Meeting of North East State for Basic Service Division and Linkage with Care Support Treatment and Research hi, National Health Mission (NHM) mission director Dr Lalrozama hoa neih a ni a; National AIDS Control Organisation (NACO) hotute leh Mizoram State AIDS Control Society (MSACS) hotute an tel.

Dr Lalrozama chuan, Mizoram chu Myanmar leh ṭhenawm state vela ruihhlo tawlhrûkna remchang a nih avangin HIV darh zel tur venna hna thawh chu chona lian tak a nih thu a sawi a, "Kohhran leh mipui mimirin ṭangruala ke kan pên loh chuan hna thawh a sâwt har em em a ni," tiin, HIV/AIDS donaah kohhran leh NGO-te'n theihtawp an chhuah ve a ngaih thu a sawi.

NACO deputy director general Dr KS Sachdeva chuan, tun hnaiah Mizoramah HIV kai hmuh chhuah zat a pung nasa tih sawiin, NACO pawhin a ngaihven hle tih a sawi a; inkalpawhna leh kawng ṭhenkhatah hna thawh chak har deuh mah se, mihring cheng zat inchhiar chuan HIV darh zel tur ven chu Mizoram tan hna harsa lutuk a la ni lo tih a sawi bawk.

Nimina Review Meeting-ah hian kum 2020 hmaa nu aṭanga nautea HIV inkai chhâwng tur leh mipat hmeichhiatna aṭanga natna inkai chhâwn ṭhin tlángláwn tak, Syphilis tihbona tura ruahmanna (Elimination of Mother to Child Transmission of HIV and Syphilis by 2020) chungchang thlûrbing a ni.

Elimination of Mother to Child Transmission of HIV and Syphilis by 2020-ah hian Mizoram chu India rama hna thawk ṭha state paruk zingah a tel a; state dangte chu - Maharashtra, Andhra Pradesh, Tamil Nadu, Telangana leh Karnataka-te an ni.

Meeting-a an tarlan danin, Mizorama HIV hrik pai hmuh ṭan hun, October 1990 aṭanga January 2018 thleng khan Mizoramah mi 6,60,934 thisen endik tawh niin, chu'ng zinga 16,451 chuan HIV hrik an pâi. General client an tih, mi náwlpui aṭangin mi 4,39,198 thisen endik tawh zinga mi 14,949 chu HIV+ve an ni a, nu nau pai (ANC) bikah chuan thisen endik 2,21,736 zinga mi 1,502 chu HIV+ve an ni.

General client bikah (nu nau pai tel loin), Mizorama HIV hrik pai hmuh chhuah tawh 14,949 zinga 9,728 chu mipa an ni a, 5,221 chu hmeichhia an ni. HIV+ve te kai chhan tam ber mipat hmeichhiatna hman aṭanga kai mi 10,060 (67.30%) an awm a, mipa 5,764 legh hmeichhia 4,296 an ni. Hriau hman aṭanga kai mi 3,983 (26.64%) an awm a; anpui kawp (homosexual/bi-sexual) aṭanga kai mi 125 (0.84%) awmin, mipa vek an ni. Nu aṭanga kai mi 478 (3.20%) leh kai chhan hriat chian loh mi 303 (2.03%) an awm bawk.

HIV+ve hmuh chhuah tawh zinga 1,766 chu an thi tawh a, chu'ngte chu mipa 1,127 leh hmeichhia 598 an ni. HIV+ve hmuh chhuah tawh zinga 12,099 chu Anti Retroviral Therapy (ART) Centre-ah an inziak lut tawh a; ART damdawi la tawh mi 9,009 awmin, tuna la mek mi 6,740 an awm a ni.

Sorkar kum liam ta, 2017-18 chhung bikah chuan, report neih chin January 2018 thlengin mi 39,520-te thisen endik a ni a, chu'ng zinga mi 1,700 chuan HIV hrik an pai tih hmuh chhuah a ni. HIV hrik pai hmuh chhuah 1,700 zinga mi 1,086 chu mipat hmeichhiatna aṭanga kai niin, chu chu 63.90% a ni a; hriau (needle/syringe) hman aṭanga kai mi 569 (33.50%) leh thil dang aṭanga kai mi 45 (2.60%) an awm bawk.