PwD hotupain department hotute a kâwm
Persons with Disability (PwD) chief commissioner Dr Kamlesh Kumar Pandey chuan, nimin khan Secretariat conference hall-ah Mizoram sorkara department hrang hrang hotute a kâwm.
Dr Kamlesh Kumar Pandey chuan, pianphunga rualbanlote chawikanna tura hmalakna hrang hrang zingah PwD Act, 1995 leh Rights of PwD Act, 2016 chuan hmasawnna tam tak a thlen tih a sawi a, "Heng Act-ah hian section hrang hrang awmin, rualbanlote'n mi dang ruala ke an pên ve theihna tura ruahmanna a ni. A hlawhtlinna tur chuan a kaihhnawih department-te'n ṭhahnemngai taka hna an thawh a ngai," a ti.
Meeting-ah hian Social Welfare, School Education, UDPA, PWD, Rural Development, Transport, Planning, Finance, ICT, AMC, Higher & Technical Education, Health & Family Welfare leh Labour, Employment, Skill Development & Entrepreneurship (LESDE) department hotute an rel a, PwD Commissioner leh hotu dangte an tel bawk.
Department tinin rualbanlote tana an hmalakna hrang hrang an tarlang a, hma an sawn lehzualna tur an sawiho nghal a ni.
Meeting-ah hian Mizoramah rualbanlote'n nun nuam zawk an neih theihna tura hmalaknate tarlan a ni a, rualbanlote tan zirna-in (school, college, etc.) 2,338-ah ramp leh toilet-te ruahman a ni. Block hrang hrangah special educator mi 123 an awm a, mi 15,160 hnenah disability certificate pek chhuah a ni tawh.
Sorkar laipuiin rualbanlote identity card siam dan thar a duan chu Mizoramah pawh kalpui niin, district tin hospital-ah ID card siam theih tura hmalak mek a ni a; tun dinhmunah Aizawl Civil Hospital, Lunglei Civil Hospital, Kolasib leh Serchhip district hospital-ah rualbanlote tan ID card siam theih tawh a ni.
Online hmanga ID card siam duh tan www.swavlambancard.gov.in ah inziak lutin, disability certificate, passport size photo leh address proof a ngai a, mi 104-in Unique Disability Indentification (UDID) card an nei tawh. Accessible India Campaign hnuaiah building 27 thlan chhuah a ni a, chu'ngahte chuan rualbanlote tan lift, toilet, handrail (vawnbán)-te siam tum mek a ni.