Multi State Mock Exercise buatsaih a ni

National Disaster Management Authority, New Delhi huaihawtin nimin khan Mizoram, Tripura leh Nagaland-ahte a rualin Multi State Mock Exercise on Earthquake Disaster buatsaih a ni a; Mizoram bikah chuan Disaster Management & Rehabilitation department huaihawta neih a ni.

Mock drill hi Aizawl bakah, district hrang hrangah neih a ni a, sorkar department eng emaw zat mite hman an ni. Aizawlah chuan Bawrhsap Pisapui aṭangin chawhma dar 10-ah siren tihrîk a ni a, chumi rual chuan chhiatrup thlen palha chhanchhuah leh chhawmdawl hna thawk chhuak tur department hrang hrangte chu District Emergency Operation Centre (DEOC)-ah an tlân khawm nghal a ni.

DEOC aṭangin chhan­chhuah hna thawk tura department pawimawh hrang hrang aṭanga din Task Force-te chu an chanvo leh an thawh chhuahna tur hmunte hrilhhriat an ni a, mock exercise kalpui a ni.

Mock exercise en­chhinna hi Millennium Centre, Capital Complex, Republic High School leh Higher Secondary School, Ramthar Veng leh Aizawl Civil Hospital-ahte neih a ni a; hengte bakah hian, lirnghing vanga Treasury Square-a thing tlu, Khatla-a electric ban tlu, Saron-Tuithiang Venga in chim leh MIZOFED pump-a kângmei chhuakin mipui tana harsatna a thlen thenfai leh chinfel hna thawh a ni bawk.

Mock drill-ah hian Police, MPRO, Fire & Emergency Services, Health & Family Welfare, Civil Aviation, IPR, PHE, PWD, Power & Electricity, FCSCA leh Forest de­partment-te bakah, State Disaster Response Force leh National Disaster Response Force-te an tel a ni.

Mock drill hi district khawpui hrang hrangah pawh tluang taka neih a ni a, an inbuatsaihna aṭang ṭha takin an ti thei nia thu dawn a ni.