DMZP-in Home minister Rijiju an kâwm

Delhi Mizo Zirlai Pawl (DMZP) hruaitute chuan April 25, Nilaini khan Union minister of state for Home Kiren Rijiju chu New Delhi-a a chenna inah an kâwm a; Mizorama dan loa ram dang mi (foreigner) lutte chungchang an sawipui.

DMZP tarlan danin, Home minister Kiren Rijiju hnenah hian Mizoram leh Assam ramri buaina chungchang an sawi a; Rijiju chuan, ramri chungchang buaipui turin senior officer a tirh nghal thu te, March thlaa Bairabi Zophaia buainaah Mizo journalist, hmeichhiate pawh Assam police-in kut an thlak vanga an hliam thute a lo hriat thu leh, Assam DGP chu action la nghal tura a hrilh thute a sawi.

DMZP hruaitute chuan, ramri hrulah immigration office mumal taka dah a, dan loa ram dang mi lutte endik thei tur din a nih theih nana hma la turin Home Minister an ngen a; hemi chungchangah hian Kiren Rijiju chuan, Mizoram sorkarin hma a lo lak a, a ṭul anga ruahmanna an siam phawt chuan Ministry of Home Affairs-in a ṭanpui theih tur thuin a chháng a ni.

DMZP hnena Kiren Rijiju sawi Ṭhenkhatte :
1. Border Security Force (BSF)-te hi mihring ei leh bar zawnna atana chêt tlatna hmunah chauh dah an ni.
2. BSF hian dan loa foreigner lo lutte check turin thuneihna an nei lo a, dan loa ram chhunga lutte chu Foreign Ministry mawhphurhna a ni.
3. BSF-te hna ber chu dan loa chetna (illegal activity) zawn chhuah leh endik a ni.
4. Ramri hrûl (international border)-a chengte hi dan leh hrai inhrilhriatna ṭha zawk neih a pawimawh a, border area-ah ram humhalhna felfai tak nei turin ramri hrûla chengte'n dan an hriata an zawm a pawimawh.
5. India leh Myanmar border hung a ni lo a, India leh Pakistan border te, Indo-Bangladesh border-te hung a ni thung.
6. America ramah pawh dan loa lutte chungchangah buaina tam tak an la nei mek a, ram ṭhang mek India ram tan phei chuan heng buaina hi chinfel a harsa lehzual.
7. Home Ministry lam pawhin vawi leh khatah dan loa foreigner lo lutte leh insumdawn tawnnate hi a titawp nghal mai thei lo. A chhan chu, ramri hrûla chengte chet tlatna te, anmahnia ei leh bar an zawnna te, ṭawng leh nunphung thlenga a khawih buai theih dawn vang a ni.
8. Border area-a dan loa lo lutte lo dang tur leh ram chîmralna atana lo venghim tur hian ramri hrula chengte an pawimawh. Dan loa lo lutte lo endik tur hian hmun hran aṭanga mi in tirh ai chuan, a ram chhunga chengte ngeiin an endik hi a hlawkin a dik zawk ṭhin.