KHAWTHLIR
Salvation Army
Salvation Army (India Eastern Territory) chuan nimin khan Mizoram hmun hrang hrangah Salvation Army kum 101 tlin an lawm. Salvation Army kum 101 tlin pual hian an biak-in hrang hrangah leh zirna-inahte sipai pawl puanzàr an zár a, zing karah Pathian hnena lawmthu sawina hun hman a ni. Kum 101-na pual hian Salvation Army Youth division, corps leh society hrang hrangte'n mi dang tana thil ṭha tihna hun an hmang a; thisen pek te, ei tur sem te, a thlawna bus service tirte an awm a ni.
Free clinic
Adventist Hospital, Aizawl chuan April 25, Nilaini khan Zonuam Primary School-ah a thlawna inentirna an buatsaih a, bialtu AMC councillor R Lalbiakthanga'n a hmanpui. Free clininc-ah hian naupang, hmeichhia lam leh ha lam thiam doctor-te an ṭhu a, mi 250 vel an inentir a; damdawi a thlawnin an sem nghal a ni.
MUP khawmpui
Mizoram Upa Pawl (MUP) chuan nimin khan Synod Conference Centre-ah inkhawmpui an hmang. An rorel inkhawmah upa/tar pension chungchang, Mizoram leh Assam ram inrina chingfel tura hmalak dan tur leh MUP Danpui siamṭhat rawtnate an ngaihtuah. MUP hian an thuvawn, ‘Mite tana malsawmna’ ni chung zela pawl thianghlim leh zahawmna kengkawh chunga hma an sawn zel avangin member-te, an thawhpui NGO leh sorkar chungahte lawmthu an sawi a ni.
CEM atana ruat turin ngen
CADC-a Congress leh BJP thawhhona United Legislature Party leader Shanti Jiban Chakma chuan April 25, Nilaini khan District Council Affairs Secretary hnenah lehkha thawnin, BJP leh Congress aṭanga MDC atana thlan tlinte ṭhukhawmin leader atan amah an thlan thu a tarlang a, "Executive committee thar ka siam theihna atan chief executive member (CEM) atan min ruat turin ka ngen a che," a ti.