Remhre zawk an awm chuan senior-te'n an up bet ringawt tur a ni lo - Lalsawta

Mizoram Taxation Service Association (MITSA) chuan, nimin khan Tourist Lodge, Chaltlangah 11th General Meeting leh Workshop on A Year of GST in Mizoram and the Road Ahead' an hmang a, an hun hmanpuitu Taxation minister Lalsawta chuan sorkar hnathawk rem hre zawk an awm chuan an senior-te'n an up bet tur a nih loh thu a sawi.

Lalsawta chuan, hmasawn turin kalphung thlak ngai a awm ṭhin tih sawiin, "Sorkar hmalaknaah pawh official tharlám zawkte thawk hmasate aia remhre zawk an awm a nih phawt chuan, senior official-te'n ramhlui rilru púin an up bet ngawt tur a ni lo," a ti.

Mipui sorkarah roreltu atana thlan tlinte'n mipui tana ṭha tur policy leh programme an duang ṭhin tih sawiin Lalsawta chuan, "Policy leh programme kalpuina tikhawtlai thei dan ding laite a awm ṭhin," a ti a; programme leh policy thar leh ṭha zawkte ṭha taka kalpui a nih theihna tur­in dan siamṭhat ngaite lo hmuh chhuah zung zung nachang hriat chu sorkar hnathawkte mawh a nih thu a sawi.

Taxation Minister chuan, state-in hma a sâwn zel avangin Taxation department pawimawhna a pung zel tih sawiin, "Tunah chuan state-in sum a thawh chhuah (state owned tax revenue) seng khawm hna lian ber thawktu Taxation department hnuaia thawkte phei chu mawhphurhna sang tak chelhtute in ni," a ti.

Taxation department hna­thawh chu sor­karin a chhuang tih sawiin, "Taxation official-te'n an zone chhunga sumdawngte chanchin an bel hle a ṭul a, chhiah­ pek khawtlai leh chhuanlam siam chíngte pawh innawr kal an ngai," a ti a; sumdawngte nena indawrnaah hawihhâwm taka dawr zel turin Taxation official-te a chah.

Minister Lalsawta chuan, tunlaia bank hrang hranga loan lakna atana Goods & Services Tax (GST)-a inziak lut a, a hnua GST chhung lut lo leh loan defaulter ni zui mi ṭhenkhatte thil tih chungchang sawiin, "A rang lamin Taxation leh bank official-te'n coordination committee neia an inràwn tlan thuai a ngai a ni," a ti.

Commissioner of Taxes K Sanglawma tarlan danin, kum 1985 khan Mizoram puma chhiah tling khawm sorkara thehluh zat chu cheng nuai 40 vel a ni a; Mizorama chhiah tling khawmte aṭanga chhûtin, kum tina state sorkar sum lak luh, chhiah tlingkhawm a pun zelna chu 29% anga chhût leh beisei ṭhin a ni.

GST hman hnuah chhiah chu kum tin 30% aia tam hretin a pung tura rin a ni. July 1, 2017 aṭangin GST hman ṭan a ni a, GST awm hnu, sorkar kum liam taa state owned tax revenue-a sum lut zawng zawng aṭanga chhûta 77.37 % chu Taxation department lak luh niin, an lak luh zat chu cheng nuai 40,513 a ni.

Kumin sorkar kum chhungin Finance department-in Taxation department chhiah lak khawm tur zat a bituk chu nuai 30,7400 a ni a, hei hi khûm beisei niin, Integrated Goods & Services Tax aṭanga luh belh tur nen cheng nuai 50,000 hmuh phâk beisei a ni.