MNYF ṭhalaite'n SIPMIU êk-in pakhat Cheng nuai 18-a an sak an sawi lang

MNF ṭhalai, Mizo National Youth Front (MNYF) headquarters chuan nimin khan Vanapa Hall kawtah street campaign a nei a; SIPMIU-in Aizawla èk-in tereuhtè 10 an sa a, pakhat Rs. 5,50,000 man tura sawi a nih laiin, an sak zawh hnuah pakhat cheng nuai 18 man vekah a chhuak niin an tarlang.

Street campaign-ah hian MNYF president Lalrinawma, MLA chuan, Congress sorkarah mipuiin huapzo sorkar an hmu lo nia sawiin, "NLUP dawng tur thlanah unit level-a inkât pawh tih tawh nâk alaiin, Assembly House-ah meuh pawh eptu MLA-te kan inkât leh a, a pawi hle. MNF kan sorkar chuan mipui huapzo sorkar kan din ngei dawn a ni," a ti.

Lalrinawma chuan, MNF an sorkar chuan SEDP hmangin agriculture market information system ṭha an kalpui dawn tih sawiin, "Agriculture market system hi tun thlengin sorkarin a din thei lo. NLUP-ah hian 90% vel hi agriculture leh a kaihhnawih atan hman a nih laiin, NLUP Marketing Board khawiah nge a awm kan hre tawh lo," a ti a; thlai thar, a bikin sawhthing hralhnaah mipui an buai em em laiin, a buaipuitu tur MAMCO chu sorkarin a ṭhiat daih niin a sawi.

MNYF vice president Lalremruata Chhangte chuan, SIPMIU-in Aizawla êk-in an sak chungchang a sawi lang a, "Aizawla SIPMIU êk-in tereuhtê, pakhat Rs. 5,50,000 man sawm an sa a, pakhat Rs. 5,50,000 mana sak chu an sak zawhah cheng nuai 18 manah a chhuak vek a ni. Hetiang hi eiruknaah an ngai lo em ni tih hi kan chief minister Pu Lal Thanhawla leh UDPA minister Pu Zodintluanga kan zawt a ni," a ti.