B-Z Road blacktop ṭha lo lai siam ṭha turin NGO-te'n contractor leh PWD an ngen
Hachhek Constituency Development Committee (HCDC) leh Chuhvel, Saikhawthlir, Zamuang Joint YMA hruaitute chuan April 24, 2018 khan Bairabi-Zamuang Road (B-Z Road) siam mek a hmunah an enfiah a; hmun eng emaw zatah kawng siam ṭha lo hmuin, chu'ngte chu siamṭha leh nghal turin contractor an hrilh.
B-Z Road enfiahtute chuan kawng blacktop chu hmun ṭhenkhatah chuan kut lâwnga hâi khawh theih khawpa chhiaa siam a nih thu an sawi a; kawng siamtu contractor chu kawng siam chhe zualte siam ṭha leh tura an hrilh bakah, kawng enkawltu PWD engineer-te pawh kawng ṭha taka siam a nih theih nana hma la turin an ngen a ni. B-Z Road siam mek chu a ṭul anga en zui zel an tum thu an sawi bawk.
Joint YMA leh HCDC hruaitute sawi danin, Teirei lei bulah PWD chief engineer, superintending engineer, executive engineer leh SDO-te an kâwm a; kawng siam ṭha lo laite chu a rang thei ang bera contractor siam ṭhattir leh nghal tur leh, tuna blacktop an khawih bak chu fûr ruahtui a tlâk ṭan tawh avangin GSB leh WBM-a a rang thei ang bera siam tur lehin an ngen a; fûr lai pawha lirthei eng chi pawh tlân thei reng tura siam turin an ngen a ni.
PWD hotute chuan kawng siam ṭha lo zual laite chu siam ṭhat nawn nghal an tum thuin an chháng a; B-Z Road thawm ṭhatna atana sum dah a tlem avangin cheng nuai 50 pek belh an tum thu te, a ṭul anga sum ngaihtuah belh zel an tum thu te, PWD Kawrthah Division-ah JCB thar pek an tum thu an sawi bawk.
Chuhvel, Saikhawthlir leh Zamuang Joint YMA chuan, B-Z Road chungchanga hma lakpuitu bialtu MLA Lalrinmawia Ralte, HCDC leh PWD hotute chungah lawmthu an sawi a ni.