Hripui vangin chhiah lut a tlahniam lo ; Taxation-in target khûm an inbeisei
Covid-19 leng avangin ṭum eng emaw zat inkhuahkhirhna leh inkhârkhip puan avangin sumdawnnate mumal taka kalpui theih ni lo mah se, kum 2021-22 budget-a Mizoramin chhiah aṭanga sum a hmuh a tlakhniam phah lo. Taxation department chuan kum 2021-22 atana chhiah hmuh zat tura an beisei chu khûm theih an inbeisei.
Kum 2021-22 budget-ah Mizoramin chhiah aṭanga sum hmuh a beisei chu cheng vbc. 719.56 a ni a, chu'ng zinga vbc. 650 chu Taxation department lak luh tura ruahman a ni. Taxation department hian thla nga, April-August, 2021 chhungin cheng vbc. 350.74 an hmu tawh a, an target zatve aiin a tam tawh.
Vanglaini palai zawhna chhangin Taxation commissioner Kailiana Ralte chuan, kum chanve hmain an target zatve aia tam an hmuh thu a sawi a, "Covid-19 vangin chhiah lut a tlakhniam phah lo a, May-ah erawh kha chuan chhiah lût a tlem deuh," tiin, harsatna a thleng a nih loh chuan target khûm ngei an inbeisei thu a sawi.
Taxation Commissioner chuan, Covid-19 avangin chhiah lutah an tuar lo anga lan rualin, hripui awm lo se tun aia tam lut thei tih a sawi a, "Hripui vangin state chhungah sumdawnna a kal mumal thei lo a, online shopping pawh rei tak kalpui mumal theih a ni lo," a ti.
Internet ṭhat tâwk loh avangin thawktute'n harsatna an tawh thu sawiin Kailiana chuan, "Aizawlah chuan internet connection vangin harsatna kan tâwk lo a, district khawpui dang zawngah chuan thawktute'n harsatna an tâwk. Connection chi hrang hrang ti ṭhin mah se, duh ang a ni thei meuh lo," a ti a; a theih ang angin hna an thawh ṭhin thu a sawi.
Taxation Commissioner sawi danin, sumdawngte'n internet connection avangin chhiah pek kawngah harsatna an tâwk lutuk lo. GST buaipui thei an awm a, a tam zawk chuan buaipui theitute chu an tihtir ṭhin. Sumdawng lian tak takte erawh chuan anmahniin an pe ṭhin thung.
Kailiana Ralte chuan, way bill leh resgistration nei lo man tur an awm ve reng thu sawiin, "GST hman a nih hnuah checkgate siam theih ni tawh lo mah se, Vairengtea kan data collection centre-ah way bill leh registration endik reng a ni a, a nei lo man tur an awm ve reng. Kan mante chu pawisa ṭhahnem tak kan chawitir ṭhin a ni," a ti.