Champhaia hman tur RT-PCR la chhuak

Champhai North bialtu MLA Dr ZR Thiam­sanga leh Champhai South bialtu MLA TJ Lalnuntluanga te chuan nimin khan Champhaia hman tur RT-PCR khawl Zoram Medical College (ZMC) aṭangin an la chhuak.

Vanglaini palai zawhna chhangin TJ Lalnuntluanga chuan, RT-PCR khawl chu Mizoram sorkarin a dil angin ICMR-in UNICEF aṭanga an dawn chu Champhai district tan an pek thu a sawi a, "ZMC-a dah reng ringawt chu ṭha kan ti lo a, Champhai district mipui aiawhin kan la chhuak a ni. A rang lamin Champhai panpui kan tum," a ti.

Dr ZR Thiamsanga chuan, RT-PCR khawl bunna tur an la tihfel loh thu sawiin, "A drawing-te siamin, khawl ken chhoh pahin a bunna tur hmun kan buaipui ang," a ti a; RT-PCR lab. din tura mamawh dangte pawh an ngaihtuah zel tur thu a sawi.