District tinah RT-PCR bun a ni dawn - Health Minister

Health minister Dr R Lalthang-liana chuan, Mizoram sorkarin district tinah RT-PCR laboratory a din dawn tih nimin khan a puang.

Secretariat conference hall-ah nimin khan Health Minister hoin sorkar hotute'n Covid-19 vei na zualte enkawlna tur intensive care unit (ICU) siam belh chungchanga hmalakna an thlirho a; Dr R Lalthangliana chuan, district dinhmun leh hmunhmate thlirin RT-PCR khawlte a tahtawla bun a nih tur thu leh a ṭul ang ang bawhzui nghal a nih thu a sawi.

Ṭhutkhawma tarlan danin, Civil Hospital, Aizawl-a ICU ward siam meka thawk tur nurse 25 sorkarin a la tawh a, ICU khum 10 chu hman nghal theiha peih a ni. Khum 10 dang chu oxygen gas pipeline vuah a la ngaih avangin a siamtu company-te nen an indawr mek a, khum pali ve ve awmna tur Pediatric ICU leh Obstetric ICU pawh peih thuai beisei a ni. Peihfel a nih hunah khum panga awm mekna medical ICU nen Aizawl Civil Hospital-a ICU-ah khum 33 a awm dawn a ni.

State Referral Hospital-a ICU-ah khum 34 a awm mek a, khum 20 dang dah belh tura hmalak mek a ni. ICU thara thawk tur nurse 50 lakna sorkarin a buaipui mek a, ICU ward thara thawk tur staff dang lak tawh sate pawh training pek vek a ni tawh. Ventilator vuahtu tur company technician-te naktukah an rawn thlen an beisei.

Civil Hospital, Lungleiah pawh a remchan dan angin ICU ward siam mek a nih thu leh a rang thei ang bera hman theih tura theihtawp chhuah mek a nih thu an tarlang bawk.

Ṭhutkhawmah hian Health & Family Welfare Board vice chairman Dr ZR Thiamsanga, MLA bakah, Health leh Finance department hotute an tel a ni.