Health Care Scheme pawhsei rél

September 28, Thawh­lehni khan Chief minis­ter Zoramthanga hoin CMO conference hall-ah Mizoram State Health Care Society (MSHCS) Governing Body ṭhutkhawm vawi 25-na neih a ni a; MSHCS policy hman mek chu March 2022 thleng pawhsei an remti.

Ṭhutkhawmah hian MSHCS, RSBY leh AB PM-JAY policy hun chu inang tlanga hman a nih theih nan an ruahman a, policy hman mek chu October aṭanga a kum leh September thleng a ni ṭhin.

Sorkar laipuiin tun hnai khan AB PM-JAY policy hun chu sorkar kum chhiar dan April aṭanga a kum leh March thla thleng ni turin a thlak a; chu vang chuan MSHCS policy hun chhung chu AB PM-JAY nena inzúl turin kum chanve chhung atan pawhsei an rel a ni.

Policy hman mek chu kum chanve chhung, October 2021 aṭanga March 2022 thleng pawhsei a, member ni tawhte tan kum khat atan ni loin, kum chanve atan premium pek ni se, inziak lût lo tan inziah luh theih hun ruahman ni se, an ti. Governing Body-a permanent member atan Planning and Programme Implementation department secretary leh principal adviser-te ruat an rel bawk.

Ṭhutkhawmah hian Health minister Dr R Lalthangliana, Health & Family Welfare Board vice chairman Dr ZR Thiamsanga, chief secre­tary Lalnunmawia Chuaungo, Health secretary R Lalramnghaka, Planning secretary Lalmalsawma Pachuau leh member dangte an tel a ni.