Ram leh hnam hmangaihtu dik tak Mi thar kan nei ruih ruih - Lalduhoma

ZPM party chuan nimin khan an pisaah an party zawm tharte lawm luhna inkhawm an buatsaih a; thu sawitu ZPM leader Lalduhoma chuan, ram leh hnam hmangaihtu dik tak mi thar an neih ruih ruih thu a sawi.

ZPM consultant Rodingliana kaihhruai inkhawmah hian Lal­duhoma chuan, "Tunah hian mi thar duhawm tak tak kan neih belh zel a, Zoram kil tin aṭangin mi thar kan nei ruih ruih a ni. Heng mite hi a hranpaa kan sàwm an ni miah lo. Ram leh hnam hmangaihna rilru dik tak pu, kum 30 chuang kan ram lo hruai tawhtute'n ram an kaihhruai dan duhkhawp loa ram thar beiseitute an ni," a ti.

Chanchin lawmawm tak an nei mah se, chapo mai tur an nih loh thu sawiin Duhoma chuan, "He dinhmun min hruai thlengtu hi mihring ni loin Pathian a ni. Bible-a hruaitu ropui pahnih Mosia leh Davida te an chapona avanga Pathianin a hrem dan zawng zawngte pawh kan hre vek a ni," a ti a; Bible chu an innghahna a nih angin Pathianin a huat ber chapona lakah invèn fimkhur a ṭul thu a sawi.

ZPM Leader chuan, Brig. T Sailo-in a hun laia a ngaih pawimawh 'Six Basic Needs' a taka buaipuitute chu ZPM an nih thu sawiin, "Kan unau PC-te kan zinga lo tel vek turin tih tak meuh meuhin kan sáwm a che u. Kan unau ZNP lo ni tawhte pawh he inpuiah hian lo tel vek turin ka sáwm che u a ni," a ti.