Mizoramah I-Lab bun thuai tum

Rajya Sabha MP K Vanlalvena chuan nimin khan Ministry of Science & Technology hnuaia Biotechnology department secretary Dr Renu Swarup chu a pisaah a hmu a; Mizoramah natna hrik enfiahna Infectious Disease Diagnostic Laboratory (I-Lab) bun thuai a nih dawn thu a lo hrilh.

Sorkar thuchhuah tarlan danin, Dr Renu Swarup chuan, "Sum harsatna karah Union minister Dr Jitender Singh hnena Mizoram chief minister Zoramthanga ngenna ngai pawimawhin Department of Biotechnology chuan Mizoram tan I-Lab pakhat a rawn bun thuai dawn a ni," a ti a, chawlhkar li chhunga tihfel a nih tur thu a sawi.

I-Lab hi Vishakapatnam-ah buatsaih mek a nih thu sawiin Dr Renu Swarup chuan, a hun takah Mizoram a thlen theihna tura thil pawimawhte lo en zui tur leh a ṭul anga IBSD, Imphal-te nen inráwn chunga ruahmanna siam turin Department of Biotechnology official pahnih ruat an nih thu a sawi bawk.

MP K Vanlalvena hi OSD to chief minister Rosangzuala'n a ṭawiawm a ni.