ICT hman ṭangkai dan tur sawiho

Human Resources Development Board bultumin School Education, SCERT, MBSE leh Mizoram IT Society-te chuan September 28, Thawhlehni zan khan sikul headmaster/principal leh education hnuaia administrator-te pualin 'Webinar on ICT Enabled School Management for Educational Adminis-trators and Head of Institution' an buatsaih a, School Education minis-ter Lalchhandama Ralte-in a hmanpui.

Lalchhandama Ralte chuan Education department chu Covid-19 hri leng avanga lockdown tuar ber an nih thu sawiin, "Zirna-in hawn theih a ni lo a, thawktute'n chawl mai loin information & communication technology (ICT) hmang ṭangkaia zirtirna in kalpui thei hi a lawmawm takzet," a ti.

Rualkhai zawka online zirtirna kalpui a nih theihna turin Human Resources Development (HRD) Board chuan May 21, 2021 khan online education committee a din tih sawiin Education Minister chuan,"Anni hmalakna aṭang hian zirna in a ICT tihhmasawn nan cheng vbc 152 hu ruahmanna kalpui mek a ni," a ti bawk.

Thusawitu dang HRD Board vice chairman L Thangmawia, MLA chuan, "Covid hripui avanga hasatna hi IT lama hmelthar hmuh nan hmang thei ila a duhawm hle," a ti a, school head leh administrator-te chuan ICT hmasawna an umphak a, a pawimawhna leh tangkaina an zir chhuah a duh thu a sawi.

Webinar-ah hian Overview of National Policy on Education tih thupui hmangin dy. director (P) Lallianzuali Bawitlung chuan head of institution-te tana hriattur pawimawh zual leh thil thar awmte a sawifiah.

He hunah hian sikul headmaster/principal leh thawktu dang mi 3,540 an tel a ni.