Chhim lam tan Covid-19 vei na zualte enkawlna hmun siam turin CM ngen

MZP headquarters, Lunglei chuan Mizoram chhim lama mipui tan Covid-19 vei damlo na zualte enkawlna tur damdawi-in, khum 30-50 tal awmna siam turin chief minister Zoramthanga an ngen.

Lunglei MZP-te hian September 27, 2021 khan Chief Minister hnenah ngenna lehkha an thawn a, Mizoram chhim lamin Covid-19 hripui an tawrh dan leh dinhmunte an tarlang a, "Chhim mipuite tan Covid-19 vei damlo zinga na zualte enkawlna tur khum 30-50 tal awmna tur hmun min siamsak turin kan ngen che a ni," an ti.

Hripui vei na zualte enkawlna tur chhim lama siam chu a theih ngeia an hriat thu tarlangin MZP chuan, "Building thar sak ngai ni loin sorkar building tam tak zingah hman rih lohte pawh a awm. Building ṭhenkhatte hi hmang ṭangkaiin chhim mipuite'n Aizawl pan kher ngai loa kan inenkawlna hmun tur min buatsaihsak turin kan ngen tak meuh che a ni," an ti a; sorkar hmalaknate an thlir zui zel dawn thu an tarlang.

Hnahthial district aṭanga chhim lam zawng district-te tan Aizawl/ZMC hlat zawng tarlangin, "Khaw kár kawng hla tak takah hian damlo chau tawh, fimkhur leh dimdâwi taka phurh leh enkawl ngaite Aizawl panpui ṭhin an ni a, oxygen pek ngai leh ṭhenkhat chu kawng laka chawlhpui pawh rem tawh lo khawpte an ni ṭhin," an ti.

Lunglei MZP tarlan danin, September 25, 2021 thleng khan Covid-19 vanga Mizorama thi mi 280 chuang an awm a, chu'ng zingah chuan Lunglei district-a mi 13, Lawngtlai district-a mi 19 leh Siaha district-a mi pathum an tel.

Lunglei, Lawngtlai, Siaha leh Hnahthial district zau zawng belh khawm chu sq.km. 8,000 chuang a ni a, Mizoram pum hmun thuma ṭhena hmun khat aia zau a ni. Mi nuai thum chuang an chêng a, chu'ng zinga mi 91,212 chiahin Covid vaccine an la kim tawh.

Lunglei MZP chuan, Health department-in July 25, 2021-a enkawlna hmun dinhmun a tarlan danin, chhim lam district pali-ah dedicated covid health centre (DCHC) leh covid care centre (CCC) 27 awmin, mi 921 awm theihna a nih thu an tarlang. Chutih laiin, nimin chawhma lam dinhmun angin, district pali-ah hian hripui vei enkawl mek mi 2,866 an awm.

MZP Hqrs, Lunglei hian CM an ngenna lehkha copy chu Health minister Dr R Lalthangliana leh Covid-19 Medical Operational Team chairman Dr ZR Thiamsanga, MLA bakah, chhim lam district pali aṭanga thlan tlin MLA zawng zawng hnenah an pe a ni.

Lunglei MZP tarlan ṭhenkhat
 July 11, 2021-ah Vansangpuii, Lawngtlai chu naute thla riat mi pai chungin Covid-19 a vei tih hmuh a ni a, a dinhmun a ṭhat loh avangin ZMC panpui a nih laiin kawng lakah a thi.
 September 21, 2021-ah Bobby Lalthanpuia, Lunglei Bazar Veng chu hripui a vei tih hmuh a ni a, enkawlna ṭha dawng hman loin a thi.
 September 25, 2021-ah C Romawia, Lunglei Rahsi Veng chu ZMC-ah refer a ni mah se, ZMC a khah avanga lo nghak rih tura tih a nih laiin a thi.
 Lalhmunsanga, Hauruang chu September 26, 2021-ah hripui vei a ni tih hmuh a ni a, ZMC panpui ni mah se, kawng lakah a thi.
 Lunglei-Aizawl hlat zawng km. 235; Lawngtlai-Aizawl hlat zawng km. 296; Siaha-Aizawl hlat zawng km. 378; Hnahthial-Aizawl hlat zawng km. 158.