Covid-19 vangin mi 306 thi tawh
Nimin khan tlai dar 5 thlengin Covid-19 vangin mi pahnih an thi a, September 28, Thawhlehni zan khan mi pakhat a thi bawk.
Sorkar chhinchhiah angin, nimin tlai dar 5 thleng khan Mizoramah Covid-19 vangin mi 306 an thi tawh a, September thla bikah mi 89 thi tawhin, hripui vanga thi tam ber thla a tling tawh.
September 28, Thawhlehni zan dar 8:30 khan nausen Brenda Zorempuii (ni 18), Lunglei Luangmual chu Lunglei Pukpuia dedicated covid health centre (DCHC)-ah a thi.
Luangmual khawtlang hruaitute sawi danin, Brenda Zorempuii hi damdawi-ina a awmnaah Covid-19 a vei tih September 22 khan hmuh chhuah a ni a, Pukpui CCC-ah a pi nen an awm zui a; September 27 khan Luangmual CCCC-ah sawn an ni. Thawhlehni zan tìr lamah a dinhmun a ṭhat loh avangin Pukpui DCHC-ah dah a ni a, a hnu lawkah a thi a ni.
Thawhlehni zan zanlai pelh hnu dar 12:05 (September 29) khan Zochhingi (85), Falkland Veng chu State Referral Hospital-ah hripui vangin a thi. Covid-19 positive a ni tih September 20 khan hmuh chhuah a ni a, September 21 aṭangin SRH-ah enkawl a ni.
Thawhlehni zanlai pelh hnu vêk dar 12:15 (September 29) khan hripui vangin Saihnuna Sailo (77), Vaivakawn chu SRH-ZMC-ah a thi. Covid-19 positive a ni tih September 24 khan hmuh chhuah niin, September 25-ah SRH-ah dah luh a ni a, natna dang nei a nih thu sorkar thuchhuakin a tarlang.