KHAWTHLIR

Rinliana dinhmun
Minister K Lalrinliana, Covid-19 vanga State Referral Hospital-a enkawl mek chungchanga 'ICU-ah ventilator a hmang' tia social media-ah thu thehdarh chu thu dik lo a nih thu sorkar thuchhuakin a tarlang a; "Pu K Lalrinliana hi a dinhmun enthla (monitor) turin ICU-ah dah niin, ventilator hmantir a ngai lo a, a khawsik pawh ziaawmin, a tho harh peih e," tia tarlan a ni.

Ambulance hlân
Mizoram Government Adhoc Aided High School Teachers Association (MIGAHTA) hruaitute chuan nimin khan School Education minister Lalchhandama Ralte chu a inah an hmu a, ambulance pahnih an hlân. Mizoramah sorkar puihna dawng govt. adhoc aided H/S 129 a awm a, chu'ngah chuan thawktu 903 an awm mek a ni.

Ráltlânte tlawh
MZP Gen.Hqrs hruaitu ṭhenkhatte leh Myanmar MP, Mizorama awm mek ṭhenkhatte chu September 24, 2021 khan Mizoram chhim lama Myanmar ráltlânte dinhmun leh mamawh an enfiah a; damdawi chi hrang hrang an hlàn nghal.

Zunthlum enfiah
Rotary Club of Aizawl leh Aizawl Adventist Hospital chuan nimin khan ‘Defeat Diabetes Campaign’ pualin Vaivakawna YMA Hall, bazar leh police station-ah a thlàwna zunthlum enfiahna an buatsaih a, zunthlum nei mi eng emaw zat hmuh chhuah a ni. Defeat Diabetes Campaign hi India ram pumah mi nuai 10 tal zunthlum natna an neih leh neih loh enfiah tura hmalakna a ni.

Councillor-in kâwm
AMC Ward no. XVII councillor David Zohmangaiha chuan nimin khan Republic Veng Local Council House-ah Republic Veng Sub-Centre hnuaia centre panga - ITI Veng, Republic Vengthlang, Upper Republic, Tuikhuahtlang leh Republic Veng centre-a thawktute a kâwm. David Zohmangaiha hian sub-centre-a thawkte'n mamawh an sawi PPE leh thil dangte a ngaihtuahsak nghal a ni.

Siaha khawpuiah two wheeler taxi
Siaha DC Kesavan R hoa nimina sorkar hotute ṭhukhawm chuan, Siaha khawpuiah two wheeler taxi tlàntir an remti a; traffic dinhmun leh parking area-te thlir chungin tun dinhmunah chuan State Transport Authority hnenah permit 50 dil ni se, an ti. Two wheeler taxi service huna khawpui chhunga traffic felfai zawk a awm theih nan a tihtur ṭulte lo bawhzui turin concern dept.-te ngen an ni.

Lungleiah Azadi KaAmrit Mahaotsav
Nimin khan Lungleiah Urban Development & Poverty Alleviation department chuan Azadi Ka Amrit Mahaotsav hnuaiah Swachhta Awareness Campaign on Source Segregation an kalpui ṭan. Lunglei khawpuia UDPA leh self help group hnuaia sanitation worker-te chuan in tinah bawlhhlawh thliar hran dan an zirtir dawn a ni.