Covid-19 vei a thlàwna enkawl theih tichiang

Hripui donaa thawktu pawh ni se duty-na aṭanga kai ni lo chu a thlawna enkawl theih a ni lo
Health & Family Welfare (HFW) department chuan September 24, 2021 khan Covid-19 vei zinga a thlâwna enkawlna dawng thei chin a tarlang.

A thlawna enkawlna dawng theite chu hripui donaa thawkte an ni a, chutih rualin, duty-na aṭanga kai ni lo leh chhan dang vanga kaite chu a thlàwna enkawl theih an nih loh thu tarlan a ni.

HFW department chuan, hripui vei a thlâwna enkawlna chu hriattirna chhuah aṭanga hman ṭan a nih thu a tarlang a; a thlâwna enkawlna dawng thei tur chuan Covid-19 donaa chanvo ruatna lehkha leh duty-na aṭanga hripui kai ngei a ni tih hriatpuina (certificate) neih a ngai.

A thlàwna enkawlna dawng thei chin tarlangin HFW chuan, "Covid-19 donaa duty-na, swab sample lakna, Covid-19 damlo enkawlna leh a dangte aṭanga Covid-19 a kai a nih chuan hriatpuina certification pek tur a ni. Duty-na aṭanga kai ni lo leh chhan dang vanga kaite chu a thlàwna enkawl theih an ni lo," a ti.

Tarlan danin, duty-naa hripui kai tih hriatpuina certificate chu health care worker-te tan anmahni controlling officer emaw, hripui a vei tih hmuh chhuah a nih laia contact tracing team/active case search team leader-te'n an pe thei a; care-giver leh task force member-te chu an veng/khuaa task force chairman/secretary emaw, positive a ni tih hmuh chhuah a nih laia contact tracing team/active case search team leader-te'n an pe thei.

A thlàwna enkawlna dil turin Covid-19 donaa chanvo ruatna lehkha leh duty-na aṭanga kai tih hriatpuina lehkha thil tel tur a ni a; September 24, 2021 hma lama hripui vei tih hmuh tawh, enkawlna senso dil let (reimbursement) duhte tan an chanvo ruatna leh duty-naa hri kai tih hriatpuina lehkha thil telin dil theih a ni bawk.