India rama hripui vei hmuh thar tam lama pathumna - Mizoram

September 28, Thawhlehni khan Mizo­ramah Covid-19 vei mi 1,380 hmuh chhuah a ni a, Kerala leh Tamil Nadu dawta hripui vei hmuh thar tamna ber a ni. Nimin khan hripui vei dam tawh mi 777 chhuahtir an ni a, mi pahnih an thi.

Covid-19 vei hmuh tharte chu ZMC labo­ratory-a hmuh chhuah 340, TrueNAT hmanga hmuh 47 RAT hmanga hmuh 938 leh Fluorescent Immunoassay (FIA) hmanga hmuh 55 an ni a; mipa 586 leh hmeichhia 794 niin, hmeichhia 208-in an tam zawk.

September 28, Thawh­lehnia Covid-19 vei hmuh thar mi 1,380-te chu symptom nei 720 leh nei lo 660 an ni a; tualchhunga kái mi 1,374 leh tun hnaia state pawn aṭanga rawn lut mi paruk niin, tualchhunga kái zingah hri an kàina chin hriat loh 574 an awm.

Hripui vei hmuh thar mi 1,380 zingah nausen kum khat tling lo 19 an awm a, an zingah symptom nei an awm nual; thla khat la tling lo pasarih an awm bakah, kar khata upa pawh la tling lo pathum an awm. Kum 90 chung lam mi pahnih an awm a, a upa ber chu kum 94 a ni.

IDSP record angin, Mizoramah Covid-19 vei 91,919 hmuh chhuah a ni tawh a, mipa 45,540 leh hmeichhia 46,379 an ni. Nimin tlai dar 5 thleng khan mi 76,182 (82.88%) chhuahtir an ni tawh a, mi 306 (0.33%) thi tawhin, enkawl mek mi 15,431 (16.79%) an awm.

September thla ni 28 chhungin hripui vei mi 31,919 hmuh chhuah a ni tawh a, chawhrualin ni tin mi 1,139.96 hmuh chhuah an awm ziah ang a ni. Kum 2011 chhiarpui aṭanga chhûtin Mizorama Covid-19 vei hmuh tawh 91,919 chu mi 1,000 zelah hripui vei mi 84 an awm ang a ni a; mi 1,00,000 zela Covid-19 vangin mi 28 an thi tawh ang a ni.

Nimin khan tlai dar 5 thlengin hripui vei dam tawh mi 777 chhuahtir an ni a; Aizawl district-ah mi 545, Siaha district-ah 59, Kolasib district-ah 52, Lawngtlai district-ah 36, Mamit district-ah 35, Lunglei leh Hnahthial district-ah 14, Serchhip district-ah 12, Khawzawl district-ah pakua leh Champhai district-ah mi pakhat an chhuak.
Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 91,919 zinga mi 87,409 chu Mizoram chhunga kái chhâwng an ni a, mi 4,510 chu Mizoram páwn aṭanga an rawn luh hnua hmuh chhuah an ni.

Nimin zinga sorkar laipuiin Covid-19 positive report a tihchhuaha a lan danin, September 28 khan Mizoram aia hripui vei hmuh chhuah tamna state pahnih - Kerala
(mi 11,196) leh Tamil Nadu (1,630)-te chiah an awm a; hmarchhak state pariat zingah hripui vei hmuh thar tam berna a ni leh bawk.

Nimina report tihchhuah a nih hnuah Mizoramah Covid-19 vei enkawl lai (active case) 16,208 an awm a, an tam lai ber a ni. Hmarchhak state zingah Mizoramah Covid-19 active case a tam fál a; India ram pumah Mizoram aia tamna state pathum - Kerala (mi 1,49,931), Maharashtra (40,367) leh Tamil Nadu (17,231)-te chiah a awm.