Rualbanlo enkawlnaah Mizoramin hmasawnna tur tam tak a la nei - PWD Chief Commissioner

Person with Disabilities (PWD) chief commissioner Dr Kamlesh Kumar Pandey chuan, Mizoram sorkar chu rualbanlote enkawl kawngah a thawh ṭhat thawkhat rualin, hmasawnna tur tam tak a la neih thu a sawi.

Dr Kamlesh Kumar hian nimin khan Hotel Floria-ah thuthar thehdarhtute a kâwm a; rualbanlote enkawl kawngah thawh ṭhat dan chu category A, B leh C-ah ṭhen ni ta se, Mizoram chu B-ah a awm thu sawiin, "Mizoram sorkar hi thawk ṭha thawkhat a; nimahsela mihring in tlem a, A category-a awm thei tur in ni a, rualbanlote enkawl kawngah model state in ni thei," a ti.

Rualbanlote chu special school kher ni lo, sikul pangngaiah pawh admit theih an ni tih sawiin Kamlesh Kumar chuan, "Tumahin an hnâwl thiang lo. Hetih lai hian, rualbanlote sikul kaina chuan special educator an nei tur a ni a, anni hian an enkawl tur a ni," a ti a; Mizoram chu rualbanlote enkawltu turte training-na hmun tur SCERT chauh a neih avangin, training-na tur hmun neih lamah ṭan lak a ṭul thu a sawi.

PwD Chief Commissioner chuan sawi danin, university leh college-ahte rualbanlote'n lehkha an zir theihna ruahman tur a ni a, chu chu a theih loh pawhin study centre tal din tur a ni. Rualbanlote enkawl hna chu state mawhphurhna a ni a, university leh college-a rualbanlote lehkha zir theihna tur ruahman te, an tana sikul hranpa dinte chu state sorkar hmalakna tur a ni.

Sorkar laipuiin rualbanlote hamṭhatna ngaihtuahsak turin September 1, 2008 khan Chief Commissioner for PwD a din a, din a nih aṭanga March 2018 thleng khan thubuai 35,690 an dawng tawh a, chu'ng zinga 33,957 chu chinfel tawh a ni. March 2018 bikah thubuai 141 dawn a ni tawh a, chu'ng zinga 190 chu chinfel a ni tawh.

Rualbanlote harsatna tawh ṭhin chingfel tur leh sukiang turin PwD Commissioner enkawlna hnuaiah ram chhung hmun hrang hrangah mobile court dah tur a ni. Mobile court-te hian complaint thehluhte lo buaipuiin, rualbanlote remchanna leh awlsam zawkna atan Chief Commissioner-te'n a department changtu officer-te nen ṭang tlangin mobile court-ah chinfel tur a ni.

Dr Kamlesh Kumar chuan, rualbanlote tana sorkar hna hauh (reservation) chu rual­banlo tan lo chuan hnawh­khah phal a ni lo tih sawiin, "Dan bawhchhia an awm chuan a department emaw, a mawhphurtu officer chu Rs. 5,000 chawi emaw, lung-in tàn thlenga hrem theih a ni," a ti.

Mizorama a chàm chhungin Governor, department hotute leh NGO hruaitute a kawm thu sawiin Kamlesh Kumar chuan, "Ka thil hmuh hrang hrang leh Mizoramin hmasawnna tur a neihte chu Chief Secretary leh department hotute hnenah ziakin ka thlen dawn a ni," a ti.