District tihpuitlin phûtin Saitualah total bandh

District headquarters atana Saitual puan tawh tipuitling tura sorkar kar nan, Saitual District Implementing Demand Committee (SDIDC) chuan nimin khan Saitual leh a chhehvelah total bandh an huaihawt a; buaina leh harsatna lian tham chhuak a awm lo.

Total bandh hi zing dar 5 aṭanga ṭanin, tlai dar 4 thleng neih a ni a; mipui chhuakvâk an awm lo a, dawr, pisa leh zirna-in zawng zawng khar a ni.

Khaw chhung hmun hrang hrangah Saitual district tipuitling thuai tura sorkar ngenna thuziak (poster leh banner) eng emaw zat târ a ni.

SDIDC chuan, total bandh hi Saitual bakah, an demand area-a khaw eng emaw zatah kalpui a nih thu leh, Chalfilh bial Phuaibuang tlangdung khuate leh Lengteng biala Ngopa tlangdung khuate pawhin an zawm ve thu an tarlang.

SDIDC chuan thuchhuah siamin, "Kan demand area khaw hrang hrang - Khawlian, Phuaibuang, Phullen leh Ngopa tlangdungah NE Khawdungsei, Ngopa, Pâwlráng, Hliappui, Saichal, Changzawl, Kawlkulh, Chhawrtui, Buhbân, Tualbung, N.Lungpher, Dilkhan leh a dang dangten kan bandh min thlawp a, lirthei engmah an tlantir lo tih kan hriat hian lawmawm kan ti. Saitual paltlang khuate'n motor tlan lo tura kan ngenna min tihhlawhtlinsak avangin lawmthu kan sawi e," an ti.

SDIDC chuan, kum 2008-a Saitual district puan tawh chu CM Lal Thanhawla leh AICC president Rahul Gandhi ten tihpuitlin an lo tiam tawh thu an tarlang a; rorel lai Congress party-a Ṭawi East Block leh an huam chhunga unit-te'n district nawr nana headquarter-a an party seal dah tura an beiseina an remti chu lawmawm an tih thu leh, sorkar pawhin seal dah kher ngai loa Saituala DC a dah thuai an beisei thu an sawi.

SDIDC chuan, district beisei ve dangte pawh sorkarin a tihhlawhtling vek thei a nih chuan lawmawm an tih thu an sawi rualin, "A tihlawhtling vek seng rih lo a nih pawhin, Aizawl district lian lutuk ṭhen nan sorkar hian an mi tiam ang ngeiin, district-in a ken office hrang hrangte a rawn dah nghal thei lo a nih pawhin, Election Code of Conduct-in a phuar hma ngeia DC rawn dah ngei turin kan phût a ni," an ti.

SDIDC hian Mizoram sorkara memorandum an thlen tur chu nimin khan Saitual SDO(Civil) R Vanlalsawma hnenah an thehlut a ni.