Tlabung leh Chawngte-ah YMA kumpuan hawng

Central YMA April 26, Ningani khan Tlabung leh Chawngte-ah YMA kumpuan, 'Ram leh hnam humhalh' tih an hawng a; a hawnna khuaa YMA member-te bakah, Aizawl leh Lunglei aṭangin YMA hruaitute an tel.

YMA kumpuan hawnna hi Tlabungah chuan community hall-ah CYMA vice president R Lalngheta'n a hawng a, CYMA finance secretary Fabian Lalfakawma'n a kaihhruai. R Lalngheta chuan, Mizoram sorkarin ram dang aṭanga dân loa Chakma rawn lûtte a ûm chhuak thei lo a nih chuan Mizo mipuite'n an ûm chhuak dawn tih a sawi.

CYMA Vice President chuan, Mizoram chu dân loa rawn lut Chakma-te chenna tur a ni lo tih sawiin, "Anmahni ûm chhuak tura tui fîm hmanin awmzia a nei lo a nih chuan, tui nú pawh kan hmang mai dawn a ni," a ti.

Tlabunga Mizote chu ram leh hnam humhalh kawnga an pawimawh thu leh an mawhphurhna hlen tura ṭan an lakna fakawm a tih thu sawiin R Lalngheta chuan, "Ramri depah hnam dang kara in awm ṭâng ṭâng hmel kan hmuh hian lawmthu kan hrilh che u a ni," a ti a; ram leh hnam humhalh kawngah Mizo mipuite'n inlungrual taka ke an pên a ṭul thu a sawi.

CYMA president hlui Lalbiak­zuala pawhin thu sawiin, ram leh hnam humhalh kawngah kohhranin mawhphurhna lian tak a neih thu a sawi a, "Kohhranin pawl ram kan buaipui avang leh member tam kan duh luatah a awm lo tur kan seng lut em, tih a ngaihtuah theih hial a ni," a ti a; kohhranin baptisma channa a pek chhuah hmanga Chakma-te'n awlsam taka birth certificate an lak ṭhin thu leh chumi hmanga India khua leh tuia an inziah luh ṭhin thu a sawi.

Lalbiakzuala chuan, kohhranin ram thima rawngbawlna atana sum a hman ralte chu retheihna vanga zirna chawlhsan Mizo ṭhalaite chhawmdawl nan leh ruihhlo bâwiha tángte chhan chhuah nan hman a ṭûl tawh em, tih ngaihtuah tham a nih thu a sawi a; Chakma-te chu ram leilung faah YMA-in a pawm ngai lo tih sawiin, "Electoral roll-ah chuang mah se, ram leilung faah YMA chuan a la pawm ngai lo a, a pawm ngai hek lo ang. Mizoramah Kristianna leh hnam pakhat inbeihna a thleng mek a, Mizo Kristiante hian kan ṭanna lam tur kan inzawh a ngai a ni," a ti.

Tlabunga YMA kumpuan hawn­naah hian Lunglei sub-hqrs. vice president K Lalfakzuala leh YMA Tlabung branch vice president C Lalthanzauva te pawhin thu an sawi.

Chawngte-ah chuan YMA kum­puan thupui hi CYMA general secretary Lalhmachhuana'n hawng­in thu a sawi a; CYMA aṭangin treasurer Lalrochhuanga leh CEC member dangte bakah, Lunglei sub-headquarters aṭangin hruaitu eng emaw zat an kal a ni.