CM Hawla Court-ah a inlan lo

Chief minister Lal Thanhawla laka inthlana affidavit dik lo thubuai chu nimin khan Serchhip chief judicial magistrate Lalngaihmawia Zote Court-ah ngaihtuah tur a ni a, CM Lal Thanhawla leh a ukilte an inlan loh avangin May 25, 2018-a ngaihtuah tura dah a ni.

Serchhip aṭanga thu dawn danin, nimin kha Serchhip CJM-in CM Lal Thanhawla, 2013 Assembly inthlan dawnah affidavit dik lo thehluta puhnna thubuai ngaihtuah tura tih hun a ni a, Lal Thanhawla leh thubuai thehluttu Lal­hriatrenga Chhangte, Serchhip-te chu inlan tura tih an ni.

Lalhriatrenga Chhangte leh a ukil pathum - C Lalramzauva, Ramthianghlima leh L Lalnunsiama te an inlan a; Lal Thanhawla leh a ukil Remsanga Nghaka te an inlan lo thung a; an aiawhin ukil Laithanpuia’n hearing hun sawn hlat a dil a ni.

Thu dawnna chuan, CJM Lalngaihmawia Zote hian Lal Thanhawla hi summon pek a tum a, mahse, a aiawha ding ukil Laithanpuia’n summon chhuah kher loa May 25-a Court a inlan tura kohna chu ṭawngkaa a lo hrilh mai tur thu a sawi avangin CJM chuan summon a chhuah ta lo.

CM Lal Thanhawla lakah hian Lalhriatrenga Chhangte chuan January 17, 2018 khan Serchhip District Court-ah criminal complaint a thehlut a, Cr.PC Section 200 hnuai­ah case register a ni.