KHAWTHLIR

Kawng enfiah
MJA leh IPR department-te chuan, nimin khan Mamit district-a PWD project hrang hrang­a hna thawh kal mek leh thawh zawh tawhte a hmunah an enfiah. Vawiin hian Khedacherra, Damcherra, Zamuang, Kawrtethawveng, Tuilut kawn kawng (KDZKT road) a hmunah an enfiah leh dawn a ni.

48% pe tawh
Sentût hri danna pek beihpui thlakna, Measles-Rubella Vaccination Campaign kal mekah Lawngtlai district-ah chuan naute thla 9 aṭanga tleirawl kum 15 inkarte zingah 48% pek an ni tawh. Sorkar thuchhuah tarlan danin, Lawngtlai district-ah hian MR hri danna la thei tur naupang 42,532 awma chhût a ni a, mi 20,263 pek tawh a ni. MR vaccination hi April 17, 2018 khan ṭan a ni.

Healthy Mizoram
Governor Lt.Gen. Nirbhay Sharma chuan nimin khan 46 Assam Rifles hmuna Healthy Mizoram Campaign neih mek a hmanpui. Larsap chuan, Healthy Mizoram Campaign-a mithiamte'n a thlawna an zirtirte chu hluta chhawr ṭangkai turin mipui a chah. Campaign hi National AYUSH Mission hnuaiah Health & Family Welfare department buatsaih a ni a, vawiinah chhunzawma zawh a ni ang.

Jubilee lawm
Chhiahtlang High School chuan nimin khan an sikulah an kum 50-na, golden jubilee an lawm a, School Education director K Lalthawmmawia'n hmanpuiin, jubilee lungphun a hawng. Chhiahtlang H/S hi April 1, 1968-ah din niin, kum 1991-ah sorkar sikulah hlan kai a ni.

Guest house hawng
Lungleia Education Guest House & Training Centre sak thar chu nimin khan School Education minister H Rohluna'n a hawng. Guest House & Training Centre hi Special Central Assistance sum nuai 120 sênga sak a ni.

Thangtung phun
Mizoram Environment & Forest Consultative Forum chuan nimin khan Reiek Ngaitlanga Zotheihuanah thing phun hnatlang an nei a, thangṭung kûng 500 an phun. MEFCOF hma­lakna hi Reiek V/C leh tlawm­ngai pawl hrang hrangte'n an thlâwp a ni.