BJP hmaah Congress an bawhkhup - Zoramthanga

MNF president Zoramthanga chuan, Congress party chu mangang takin an tâl buai mek nia sawiin, an mangang lutukin eng pawh tih an huam ta niin a sawi a; Congress party chu an hmelma BJP hmaah an bawkkhup ta niin a sawi bawk.

Nimina Mizo Hnam Rúna inkhawmah Zoramthanga chuan CADC-a sorkarna siam tuma Congress hmalak dan a sawi a, "An corrupt lutuk avangin an kulhpui Chakma mipui meuh pawhin an hnâwl hnu hi chuan, an mangang lutukin eng pawh an huam ta a ni tih hriain, Mizo mipuite pawhin an dinhmun hi kan hriatthiam a ṭul ta a ni," a ti.

CADC-ah MNF leh BJP-in thawkhoa sorkarna siam tum thu chu amah leh BJP president Prof. JV Hluna ten an puang ve ve tih sawiin Zorama chuan, "He thu hi Congress-in an hriatin an mangang em em a. Chawngte-a Pu Zodintluangate ho awm chuan an mite leh BJP thlan tlin tharte chu sorkar siampui tumin an buai ta chuk chuk a ni," a ti a; Congress chu MDC member nei tam zawk ni mah se, MDC nei tlem zawk BJP thláwp turin an zak zo ta ngang lo niin a sawi.

Zoramthanga chuan, Central-ah Congress chu recognise opposition group pawh tling zo loin an tlachhe tawh a, state 29 zinga inthlan apiangah Punjab tih loah chuan an tla zel tih sawiin, "An kulhpui hlunah leh zel an han tlak leh chuan tlàwm leh zah an dáwn zo ta ngang lo a ni. An Congress nihna zawng zawng pawh hlîp a, party emaw, group thar emaw hial din chawp a, BJP hmaa bawhkhup hi an duh dáwn leh dáwn loh kan en tlang dawn a nih hi," a ti.

MNF President chuan, BJP leh Congress chu party indo nasa ber an ni tih mipuiin an hre vek tih sawiin, "Chuti chunga engkim huama Congress-in, 'Ka rawn in surrender e, dawl zawrin ka zawr, ka pu Sai-sawm-kap' tiin BJP hmaah an bawhkhup ta a ni," a ti a; BJP-in an chhan dan tur Zoram mipuiin an thlir mek tih a sawi.