Congress MLA-te'n theihtawp chhuah a ngai - Lalsawta

Finance minister Lalsawta chuan nimin khan Congress Bhavan-a inkhawma thu sawiin, "Keini Congress MLA-te pawh hi tla thei vek kan ni a, chuvangin, tla lo tura theihtawp kan chhuah leh a ngai dawn," a ti.

Lalsawta chuan, MNF pawhin sorkar siam ve leh tawh an châk hle tih sawiin, "Ek-in kal thei leite an châk leh tawh a ni mai thei. Pu Lal Thanhawla ho hian mipuite an dinchhuah hi kan duh ber a ni a, chumi atan chuan NEDP kan buatsaih a ni," a ti a; eikhawp chauh thar ṭhinin hralh chhuah tham an thar theih nan hma an lak mek thu a sawi.

Finance Minister chuan, GPF withdraw chungchangah mi ṭhenkhatin hlawh neiin an dilsak ṭhin tih tunlaia titi awm sawifiah­in, "GPF mamawh si, a ngaihna hre lote'n hmuh ngei an duh luatah a ti thei âwma an ngaihte dilsak turin an ti ṭhin a, chutianga mi pakhat mai ni lo, mi pali/pa­ngate GPF withdraw tur lo buaipui ṭhinte chuan remchang lain lawmman an phût ṭhin a ni awm e. Hei hi Finance department chuan a hriatpui lo," a ti.

Lalsawta chuan, "GPF hi a neitute chu a withdraw diltute an ni a, sorkarin an pawisa kan kawlsak reng hian a pung a sàn bawk si avangin a theih chin chin chu pek chhuah kan duh zawk. Chuvangin, department tinah thla thum danah cheng nuai 3,500 pek ṭhin a ni a, hna dang thawk hman meuh loa minister-a dilna lut ṭhin tihreh nan department-a officer 24 hnenah cheng nuai 100 ṭheuh pek chhuah theihin ruahman a ni," a ti a; sorkar secretary liante chu a ṭul dan azirin GPF pe chhuak turin thuneihna pek an nih thu a sawi bawk.