Khawlailungah hmasawnna hnathawh hawng

Mizorama SAGY Model Village hmasa ber, Khawlailung khuaa tui pump thar, veng chhung inkalpawhna PCC pavement thar leh National Institute of Electronics & Information Technology (NIELIT) study centre thar chu nimin khan Lok Sabha MP CL Ruala leh bialtu MLA Vanlalawmpuii Chawngthu ten an hawng.

Hmasawnna thil tharte hawnna inkhawm hi Khawlailung community hall-ah neih a ni a; MP CL Ruala chuan, model village a thlan dawnin khawi khua nge inlungrual ang a, model village thil tum tihlawhtling thei tura ṭangrual ber ang tih a ngaihtuah thu sawiin, "Heng ka ngaihtuahnate hi Khawlailungin an tlin ber ka rin vangin ka thlang a ni," a ti.

Sorkar hmalakna leh hmasawnna thil tinrengte chu neitu nihna rilru pûa kalpui thei khawtlang mipui model village-in a mamawh tih sawiin CL Ruala chuan, "Mipuite'n khawtlang hruaitute kan thawhpui thiam avangin tunah chuan khaw nuam leh hmasawn tak kan ni ta," a ti a; Khawlailung V/C-te chu Serchhip district-a V/C ṭha bera thlan khawpin hna an thawh ṭha niin a sawi.

Minister Vanlalawmpuii Chawngthu pawhin thu sawiin, mipui thawhpuina tel lo chuan minister, MLA leh sorkar hnathawkte'n hna an thawk tak tak theih loh thu a sawi a, "Kan biala hmasawnna tam tak a awm chhan chu mipui thawhpuina ṭha kan dawn vang a ni. Bial mipuite min thawhpui zel turin ka sawm che u a ni," a ti.

MP leh MLA-in an hawn tâk tui pump thar hi cheng nuai 16 sênga bun a ni a, darkar khatah tui litre 15,000 pump thei tur a ni. PCC pavement chu cheng nuai 15 sênga siam niin, km. 1.32-a thui a ni a; NIELIT study centre chu MP fund hmanga sak a ni.