Smart City chung­chang zirho a ni

Nimin khan Aijal Club-ah 'Sustainable Urban Development' tih thupui hmangin Smart City workshop buatsaih a ni a, Governor Lt.Gen. Nirbhay Sharma-a'n a hmanpui.

Governor chuan, smart city chu thil pawimawh, kan hun tawng mek nena inrem tak, Mizoram leh India ram tana pawimawh tak a nih thu sawiin, "Smart city zinga Aizawl a tel theihna tura state leh central sorkarte hmalakna a fakawm hle. Project hlawhtlin nan a nghawng mipuite an tel a pawimawh," a ti a; ni zung chakna, zirna siam danglam leh thiam thil lama hmasawnnate chu smart city policy paper report buatsaih nan a pawimawh thu a sawi.

Himalaya tlang rama cheng mipuite chu thing­tlang aṭangin khawpui lamah eizawnna ṭha zawk zawngin an pêm lut zel tih sawiin Larsap chuan, "Rualkhai zawka thing­tlang leh khawpuite kan tihhmasawn loh chuan, khawpuia hmanrua (resource) kan neihte'n min daih dawn lo a ni," a ti.

Mizoram University vice chancellor Prof. KRS Sambasiva Rao chuan, smart city sawifiahna chu khawpui awmna hmun azira a danglam thu sawiin, "Mipui chengte mamawh ang zela plan duan a pawimawh," a ti a; tui chhia leh bawhhlawh sawngbawlna, public transport changtlung leh chhungkaw mamawh lam kim theihna supermarket-te Aizawlin a mamawha a hriat thu a sawi.

Workhop hi Heidelberg University-a Observer Research Foundation (ORF), New Delhi-a School of Planning and Architecture, Mizoram University, Gottingen University, Deutsche Gesellschaft für Internationale Zusammenarbeit (GIZ) leh Indo-German Chamber of Commerce (IGCC) te buatsaih a ni.