Press mite'n Mamit district kawng an en

Mamit district-a kawngpui sial leh chei ṭhat mekte chu April 27-28, 2018 khan thuthar thehdarhtute'n an tlawh. Bairabi-Zamuang kawng (B-Z Road), tun hnaia blacktop hnu lawka hmun ṭhenkhat a khawh leh nghal chhan chu, blacktop dáwnah lei chhêm fai tâwk loh vang leh alkatra chawlhpawlh ṭhat tâwk loh vang a nih thu PWD hotute'n an sawi.

Thuthar thehdarhtute hian Lengpui-Mamit kawng, National Highway 44A leh Lengte pêng aṭanga Diakdâwk lui pawhna kawng km. 5.135-a thui an en hmasa ber a; Lengte-Dialdawk kawng hi kum 2016-ah cheng vbc. 66.79 man tura siam niin, agreement amount chu vbc. 42 a ni a, siam zawh a nih chuan Lengpui lam kawng aiin km. 7-in a tâwi zawk dawn a ni.

PWD SDO R Lalpeka chuan, NH-44A kawng zauh leh laih thar chu metre 7-a zau a nih thu leh, hmun ṭhenkhat, lei hnipna laiah chuan concrete-a siam a nih tur thu a sawi. Dâmpui panna kawng chho leh kawi ulh tak tak hêlna turin kawng thar laih a ni a, km. 17-a thui laih turah km. 8 laih zawh a nih tawh thu, a bialtu PWD SDO Kaphmingliana'n a sawi. NH-44A kawngpui thar hi Mamit khaw chhungah lut loin, Bâwngvâ bulah a chhuak a ni.

NH-44A hi Lengpui zero point aṭanga inṭan a ni a, Bâwngva aṭangin Darlâkah kal zelin Tuidam a hêl a, Tumpangluiah kalin, Tripura-ah a lut dawn a ni. A vaiin km. 103.618-a thui a ni dawn a, Tripura lama kaina turin Langkaih luiah lei thar dawh a ni dawn a, Tripura-a Zampui tlangdungah a chhuak ang.

Thuthar thehdarhtute hi Mamita PWD executive engineer R Dawngsangliana'n Mamit khawpui chhung inkalpawhna kawngpui, NEDP sum hmanga an chei ṭhat a fanpui a; Mamit leh Tlawng (Bairabi lei) inkar kawng chu sum awm loh vanga an siam theih loh thu leh, sum awm ang angin kawng khuar laite an hnawh thu a sawi.

Press mite hian April 29, Inrinni khan Khadicherra- Damchherra-Zawlnuam-Kawrthah-Tuilut (KDZKT) kawng an en a; kawng hi intermediate lane, NEC sum cheng vbc. 179.63 hmanga chei ṭhat a ni. Kawrthah-Kanhmun inkar kawng, kum 2010 vela blacktop tawh chu PWD-in an thawm ṭha mek a, km. 88.5 blocktop turin km. 18 zawh tawh a ni.

Bairabi-Zamuang kawng (B-Z Road) km. 28-a thui, tun hnaia blacktop hnu lawka hmun ṭhenkhat khawk leh social media-a tarlan chung­changah PWD EE Vanlalruata Sailo chuan, kawng chhiat leh mai chhan chu, blacktop dáwnah lei an chhêm fai tâwk loh vang leh alkatra chawlhpawlh ṭhat tâwk loh vang a nih thu a sawi. Alkatra bei ngheh hmain motor lian­in an rahin a khawh ṭhin thu leh sum duh tâwk a awm loh vangin milimetre 30 chauha estimate siam a nih thu a sawi bawk.

Thuthar thehdarhtute hian Bairabia Tlawng lei dawh zawh tawh, lirthei chi tin kal kai theiha hman mek chu an tlawh bawk a; lei hi metre 160-a sei, cheng vbc. 12.21 sênga dawh a ni. Vanlalruata Sailo chuan, Mizoram leh Tri­pura inkalpawhna Lang­kaih lei chu a têt bakah, a hlui tawh avangin Mizoram PWD-in dawh ṭhat tumin hma an la lak thu a sawi a, "Langkaih lei hi Tripura PWD-te dawh a ni a, hman ní lawk khan Tripura leh Mizoram PWD chief engineer-te an indawr a, lei dawh ṭhat hna hi Mizoram PWD-in NABARD sum vbc. 22.3 hmangin an dawh dawn a, double lane tur a ni a, kum hnih chhunga zo tura ruahman a ni," a ti.

Mizoram khawtlang lam kawng ennaah hian press mi pariat an kal a, IPR director David L Thang­liana leh IPRO Andrew H Lalremruata ten an hruai a ni.