Darlawn Welfare-in Tuirni lei an tlawh
Darlawn Welfare Committee, Aizawl chuan Inrinni khan Sesawng leh Khawruhlian inkara Tuirini lei chim dawh ṭhat tum mek chu an enfiah a; PWD hotute chu fûrpui hmaa lei dawh zo hman ngei turin an ngen.
Darlawn Welfare Committee (DWC) chairman Vanlalpara chuan, fûrpui a thlen tak tak hmaa lei dawh zawh a nih loh chuan hmar lama khaw tam takin harsatna an tawk dawn tih sawiin, "Kan unaute hian harsatna an tawh kan phal lo. Tha thawh ve a ṭul pawhin kan inhuam reng a, lei dawh tikhawtlai thei zawngin tumah harsatna siam lo turin kan ngen. Lei chim hi political advantage leh politics-a inchirhthehna atan hman kan phal lo," a ti.
DWC hruaitute chuan, Tuirini lei chim chu pawi an tih thu sawiin, "Vanduai vang liau liaua thleng chu a ni a, sorkar leh mipui pawhin pawi kan ti a, nunna hlu tak chan a ni leh zel phei kha chu pawi kan ti tak zet a ni. Chutih rual chuan, he kawng pawimawh dan chu sorkar pawhin a hre reng chunga a dawh thar hna a kalpui nghal mai lo kha hriatthiam harsa kan ti a ni," an ti a; lei chim aṭanga thla hnih velah hna thawh ṭan chauh a nih thu an sawi.
Tuirini lei hi Tuivawl constituency chhunga khua awm zawng zawng (khaw 24) leh Chalfilh biala khaw 23 zinga 13-te kal pawhna kawng awm chhun a nih thu sawiin DWC hruaitute chuan, "Fûrpui a thlena kal kaina tur a awm loh chuan heng khaw 37-te hian harsatna an tawh nasat dan tur kan suangtuah ngam lo. Kan u leh nau, kan hmangaihte hi he lei kal kai theih a nih loh vanga manganna an tuar a nih ngat chuan kan rilru a na ngawt ang," an ti.
DWC chuan, hna thawhna hmun Mizoram PWD hotute'n an ṭhutchilh tlat chuan an thla a timuang tak zet tih sawiin, "Hna hi chak taka kalpui tura kan duh rual hian, quality control lamah monitoring ṭha taka kalpui tur pawhin PWD engineer-te kan beisei a ni," an ti a; hna thawktu SLT company hotute chu ageement an siam tawh angin, hna dan thawh dan Aizawl DC hnenah chawlhkar tin report tura an phût thu an sawi.
PWD hotute sawi danin, PWD Engineer-in-Chief chuan lei dawhna tur ban siam hna hna thawktu SLT company-te chu May 15, 2018 hmaa hna zo turin a hriattir a; mahse, company lam chuan May 20 hma chuan an zawh theih loh tur thu an sawi thung. Lei dawhna tur ban siam zawh a nih hnuah PWD mechanical engineer-te'n lei dawh hna an thawk dawn a, chawlhkar thum velah zawh theih an inbeisei a ni.