2018-19 Voluntary blood donation target 90%

Association for Vo­luntary Blood Donation (AVBD) chuan, kum 2018-19 chhunga Mizo­ram puma a thlawna thisen pek, voluntary blood donation-ah target an siam a, chu chu 90% a ni.

Voluntary blood donation 90% a tlin theih nan theihtawp chhuahpui turin pawl hrang hrangte leh Mizoram mipuite an sáwm.

AVBD chuan thu­chhuah siamin, April 27, 2018-a meeting an neihah April 2018 - March 2019 chhunga Mizoram puma voluntary blood donation target atan 90% a tuk tih sawiin, "Target tlin tur hian AVBD chuan sorkar leh blood bank-te nen thawkhoin theihtawp a chhuah dawn a; chutih rualin, thisen petu mipui, a bikin ṭhalaite an pawi­mawh ber avangin, target tlin a nih theih nan Mizoram mipui zawng zawng thawhpuiah kan sáwm a ni," an ti.

AVBD tarlan danin, voluntary blood donation hi Mizoramah 90% a tling tawh ṭhin a, 94%-te pawh a tling tawh. Mahse, tun hnai kum nga vel kal ta aṭangin a tlahniam a, chumi hnuah, tun hnai tê, kum hnih vel aṭangin a kâng leh deuh a ni. Kum 2016-17 chhunga voluntary blood donation chu 83.27% a ni a, kum 2017-18 chhunga voluntary donation chu 83.36 a ni thung. Kum 2018-19 chhunga 90% tlin turin kum hmasa aia 6% chuanga a pun a ngai dawn a ni.

AVBD chuan, kohhran ṭhalai pawl hrang hrang te, YMA leh NGO dang te, zirna in hrang hrang te, political party te, sorkar department-te chu thisen pek uar turin an sáwm a, "A bik takin, kohhran ṭhalai pawl, YMA branch-te leh zirna-inte chu kum khat chhungin vawi khat donation camp huaihawt duhtâwk mai lo a, vawi hnih/thumte huaihawt turin kan ngen a ni," an ti.

Aizawl Civil Hospital Blood Bank-in mobile dlood donation van pahnih an neih tawh avangin, chumi hmang chuan donation camp tih theih a nih thu an sawi. AVBD chuan, "Mi dangte tana malsawmna ni a, mi nunna chhan tura thisen hlu tak petute zawng zawng chungah lawmthu kan sawi a ni," an ti bawk.