CM-in Mizote an awmna ramah khua leh tui ṭha ni turin a chah

Chief minister Lal Thanhawla chuan, Mizo hnam pêng hrang hrangte chu khawi ramah pawh chêngin awm se, an awmna ram tan khua leh tui ṭha ni zel turin a chah.

CM Lal Thanhawla hian April 27, Zirtawpni zana Mizoram University auditorium-a Miss Zofa International 2018 grand finale a hmanpuinaah thu sawiin, "Zo fate hi khawi rama chêng pawh ni ila, sorkar min awptute ṭheuh lakah khua leh tui ṭha kan ni zel tur a ni", a ti.

Hawla chuan, Kum-pinu sorkarin Mizote chu ram hrang hrangah an ṭhendarh tih sawiin, "Vawiin thlengin khawvel ram hrang hrangah cheng mah ila, thlah khat kan nihna leh kan inunauna chhawm nun zel nacháng ṭhangtharte'n an hria hi a lawmawm hle ni," a ti a; Mizote chu khawi ramah pawh awm se, an awmna ramah khua leh tui rinawm, mahni intodelh leh ram tihmingṭhatu ni vek thei turin a chah.

"Zofate inpui bera kan ngaih Mizorama chengte pawh nu leh pa chang a, kan unaute ram dang leh state dang awmte tuamhlawmtu nih kan tum tur a ni," a ti bawk.