MNF-in sorkar siamtir turin Governor ngen

Chakma Autonomous District Council (CADC) inthlana zawh taka MNF aṭanga thlan tlin MDC pariatte chuan, April 28, Inrinni khan Governor hnenah lehkha an thehlut a, MNF Legislature Party leader Rasik Mohan Chakma chu chief executive member (CEM)-a ruat turin an ngen.

Governor pisaa an kalnaah hian MNF MDC-te an kim a, MNF general headquarters hruaitute'n an ṭawiawm. An lehkha chu Governor private secretary Lalngaihzuala hnenah an thehlut.

MNF MDC-te chuan, CADC inthlan zawh takah MNF chu member nei tam ber an nih thu ziakin, CADC-a sorkar siam turin member an ngah tâwk niin an sawi a; Congress leh BJP MDC-te inkarah harsatna a awm avang leh Congress MDC-te inkara harsatna awmte avangin MNF-te chu siam thei an nih thu an ziak bawk.

MNF Legislature Party leader RM Chakma chuan, Governor-in sorkarna siam tura a tih chuan fiahna, vote of confidence a paltlang thei dawn niin a sawi a, "Congress-in CADC-a MNF sorkar an hlauh em em chhan chu, an sorkar kha corruption-in an khat a, chhuichhuah an hlau em a ni," a ti.

CADC-a MNF an sorkar laiin hmasawnna hna nasa takin an thawk nia sawiin, an sorkar leh chuan development nasa takin an kalpui leh dawn niin a sawi.