HIV+ve hmuhchhuah zat a pung zel ; Tun hnaiah inchiuna aṭanga kai an pung

Tun hnai kum thum/li chhunga Mizorama HIV hrik pai hmuh chhuah zat a hma kum aiin a pung vek a; kum 2017-18 bik erawh report hriat kim a la nih loh avangin a hma kum, 2016-17 aiin a tam zawk dawn em tih hriat a la ni lo. Kum 2014-15 hnu lamah inchiuna hriau (needle & syringe) thinghlim lon hman aṭanga HIV hrik pai an pung tial tial.

Tun hnaia Aizawla Review Meeting of North East State for Basic Service Division and Linkage with Care Support Treatment and Research-a MSACS record tarlan danin, kum 2014-15 chhung khan thisen endik 39,823 zinga 1,159-in HIV hrik an pai a; kum 2015-16 chhungin thisen endik mi 42,689 endik zinga 1,325 leh kum 2016-17 chhungin thisen endik 46,009 zinga mi 1,898-in HIV hrik an pai tih hmuhchhuah a ni.

Sorkar kum liam ta, 2017-18 ah erawh chuan January 2018 thleng record hriat a ni tawh a, kumin February leh March thla record hriat a la ni lo. Sorkar kum liam ta thla 10 (April 2017 - January 2018) chhungin mi 39,520 endik niin, chu'ng zinga 1,700 chu HIV+ve an ni tih hmuhchhuah a ni.

Kum 2014-15 bikah hian HIV+ve hmuhchhuah 1,159 zinga 892 (77%) chu mipat hmeichhiatna aṭanga kai an ni a, hriau (needle & syringe) hman aṭanga kai 226 (15.50%) leh chhan dang vanga kai 41 (3.50%) an awm.

Kum 2015-16 chhunga HIV+ve hmuhchhuah 1,325 zinga 944 (71.20%) chu mipat hmeichhiatna aṭanga kai an ni a; hriau hman aṭanga kai 327 (24.79%) an awm a, mi 54 (4.10%) chu thil dang aṭanga kai an ni.

Kum 2016-17 chhungin HIV+ve 1,898 hmuhchhuah thar an ni a, chu'ng zinga 1,216 (64.10%) chu mipat hmeichhiana aṭanga kai an ni. Hriau hman aṭanga kai mi 623 (32.80%) leh thil dang aṭanga kai mi 59 (3.10%) an awm.

Sorkar kum liam ta, 2017-18 chhung khan January 2018 thlengin HIV+ve hmuhchhuah tawh mi 1,700 zinga 1,086 (63.90%) chu mipat hmeichhiatna aṭanga kai an ni a; hriau thianghlim lo hman aṭanga kai mi 569 (33.50%) leh thil dang aṭanga kai mi 45 (2.60%) an awm bawk.

Hetih lai hian, Mizorama HIV hrik hmuh chhuah hmasak ber, October 1990 aṭanga kumin January thlenga HIV+ve hmuhchhuah tawh zat chu 16,451 an ni a; chu'ngte chu general client bikah mi 14,949 leh nu nau pai zingah 1,502 an ni. HIV+ve zinga mi 1,766 an thi tawh a, chu'ngte chu mipa 1,127 leh hmeichhia 598 an ni.