KHAWTHLIR

Lawngtlai SP leh MJA inkâwm
Lawngtlai superintendent of police (SP) thar Amit Goel, IPS chuan April 27, 2018 khan a pisaah Lawngtlai district MJA member-te a kâwm. Amit Goel chuan, Lawngtlai district chhungah ṭha taka dan leh thupek kenkawh a nih theih nan thawhpuiah a sáwm a; Lawngtlai district chu international boundary thui tak nei a nih avangin venhimna lamah thâ thlah loa thawh a ṭul thu a sawi.

Nodal department
Chief Secretary-in thupek chhuahin, Mizoram sorkara Environment, Forest & Climate Change department chu Save Chite Lui Coordination Committee tan nodal department-a ruat a nih thu a puang.

BSI Jubilee Ride
Bible Society of India (BSI) Aizawl Auxiliary hnuaia Youth Committee chuan, vawiin hian Aizawlah Jubilee Ride an huaihawt dawn. Jubilee Ride hi chawhma dar 10-ah Millennium Centre-ah a hawnna leh a ṭan hun hman a ni ang a, Saikhamakawn, Melthum, Hlimen leh Samtlangahte inkhawm buatsaih a ni ang.

AMGU thuchhuah
All Mizoram Guide Union (AMGU) chuan thuchhuah siamin, an pawl hriatpui loha motor hruai kawi ching hnam dang inrawlh an awm ṭhina an hriat thu an tarlang a, bungraw neitu leh sumdawngte an him tlan zawk nan motor hruai kawi hriate chu an hnena hriattir turin an chah. AMGU chuan, Ch. Saprawnga Truck Terminal, Rangvamuala bungraw phur motor liante him taka an tum hmun an thlen theih nana hma latu niin an insawi bawk.

Thisen pe
Inrinni khan Salvation Army Youth, Central North Division-in Aizawl Bazar Corps-ah Aizawl Civil Hospital tan thisen unit 124 an pe a, a petute mipa 97 leh hmeichhia 27 an ni. Airfield Vengthar Branch KṬP-in Synod Hospital tan unit 21 an pe a, a petute mipa 19 leh hmeichhia pahnih an ni a; Serchhip Hmarveng Branch KṬP pawhin Serchhip District Hospital tan unit 19 an pe bawk a, a petute mipa 17 leh hmeichhia pahnih an ni.